Bu gün, 24 fevral tarixində Marneulidə hüquq və insan haqları
haqqında maarifləndirmə səviyyəsinin yüksəldilməsi məqsədi ilə
təlim keçirilib.
Daxili İşlər nazirinin keçmiş müavini Natia Mezvrişvili və
hüquqşünas, hüquq müdafiəçisi Qoqa Xatiaşvili təlim iştirakçılarına
hüquq-mühafizə orqanlarının funksiyaları, onlarla ünsiyyət yolları,
səlahiyyətlərdən sui-istifadə etməkdən müdafiə imkanları, qadına
qarşı zorakılıq, erkən yaşda evlilik və s. mövzularda məlumat
veriblər.
“Maraqlanan şəxslərlə iki əsas mövzunu müzakirə etdik. Bu hüquq
məsələləri, konkret olaraq hüquq-mühafizə orqanlarının, məhkəmənin
funksiyaları, onların işləmə spesifikası və vətəndaşların bu dövlət
qurumları ilə ünsiyyət zamanı nəyi bilməli olduqları, hansı
hüquqlarının olduğu, həmin qurumlardan öhdəlik daşıdıqları
funksiyaları yerinə yetirmələrini necə tələb etməkləridir. İkinci
mövzu insan hüquqları ilə bağlıdır. Biz bir neçə mühüm məsələni
ayırdıq, bu qadına qarşı və ailədə zorakılıqdır. Bu məsələlər
xüsusilə aktualdır və hələ də böyük problemlərdən biri olaraq
qalmaqdadır. İkinci mövzu yetkinlik yaşına çatmamış şəxslərə qarşı
törədilən zorakılıqla bağlıdır. Biz burada uşaqlara və erkən yaşda
evliliyə xüsusi diqqət çəkmək istəyirik”, – Qoqa
Xatiaşvili bildirdi.
Daxili İşlər nazirinin keçmiş müavini Natia Mezvrişvili “Marneuli”
radiosu ilə söhbəti zamanı bildirdi ki, vətəndaşlarla görüşmək və
onlara hüquqları haqqında məlumat vermək mühümdür. Çünki bu gün
Gürcüstanda olan genişmiqyaslı təşviqat vətəndaşlara düzgün məlumat
vermir.
“Ən əsas odur ki, demokratiyanın, müstəqil məhkəmənin
vətəndaşların gündəlik həyatına hansı təsirinin olmasından, bizim
müstəqil məhkəməmizin olmasının niyə vacib olduğu, bunların
hamısının iqtisadi inkişafla, iş yerləri, kriminal vəziyyət,
təhlükəsizliklə hansı əlaqəsinin olması barədə
danışdıq".
Təlimçilərin bildirdiyinə görə, əhali ilə görüşlər və onlara
hüquqları haqqında məlumat verilməsi gələcəkdə də davam
etdiriləcək. Qoqa Xatiaşvilinin sözlərinə görə, hər bir maraqlanan
şəxsin təlimlərdə iştirak etmək hüququ var və bu tam
təmənnasızdır.
Təlim Demokratiyaya Dəstək Mərkəzinin təşkilatçılığı ilə “National
Endowment for Democracy”-nin dəstəyi ilə, “Gürcüstanda mülki təhsil
və iştiraka dəstək” layihəsi çərçivəsində keçirilir.