Առողջապահության և սոցիալական հարցերի հանձնաժողովի գործունեության շրջանակում երկրում ժողովրդագրական իրավիճակը ուսումնասիրելու և համապատասխան առաջարկություններ մշակելու նպատակով կստեղծվի աշխատանքային խումբ։ Այդ մասին հայտարարել է հանձնաժողովի նախագահ Զազա Լոմինաձեն։

«Մեր երկրում, ինչպես աշխարհի շատ երկրներում, ժողովրդագրական քաղաքականությունը մարտահրավեր է, և բնակչության թիվը նվազում է։ Իշխանության հիմնական առաջնահերթություններից մեկը ժողովրդագրության հարցն է, սակայն վերջին տարիներին, քովիդ համավարակից հետո, երկրում ձևավորվել է

բացասական ժողովրդագրական հավասարակշռություն։ Այդ պատճառով որոշեցինք հանձնաժողովում ստեղծել աշխատանքային խումբ, որը կմշակի առաջարկություններ՝ ուղղված երեխաներ ունեցող ընտանիքների սոցիալ-տնտեսական վիճակի բարելավմանը։ Այդ առաջարկությունները կներկայացվեն Վրաստանի կառավարությանը», — հայտարարել է Զազա Լոմինաձեն։

Հանձնաժողովի նախագահի խոսքով՝ աշխատանքային խմբում, խորհրդարանի անդամների հետ միասին, կընդգրկվեն Վրաստանի կառավարության վարչակազմի, օկուպացված տարածքներից տեղահանվածների, աշխատանքի, առողջապահության և սոցիալական պաշտպանության, կրթության, գիտության և երիտասարդության, ֆինանսների, էկոնոմիկայի և կայուն զարգացման, տարածաշրջանային զարգացման, արդարադատության նախարարությունների, Վրաստանի պատրիարքարանի, ՄԱԿ-ի Բնակչության հիմնադրամի և Վիճակագրության ազգային ծառայության ներկայացուցիչներ։

Բացի այդ, աշխատանքային խմբի աշխատանքներին ժամանակավոր անդամի կարգավիճակով կմասնակցեն Աջարիայի ինքնավար հանրապետության կառավարությունը, Թբիլիսիի և Բաթումիի քաղաքապետարանները, ինչպես նաև ոլորտի փորձագետներ։