Վրաստանի ֆինանսների նախարարության քննչական ծառայությունը, համագործակցելով Քվեմո Քարթլիի տարածաշրջանային դատախազության հետ, ձերբակալել է երկու անձի: Նրանք մեղադրվում են առևտրային կաշառակերության, կեղծ պաշտոնական փաստաթուղթ պատրաստելու և տրամադրելու մեջ:

Քննությունը պարզել է, որ մեղադրյալներից մեկը Մառնեուլիի տեխնիկական զննման կենտրոնի տեսուչ է եղել: Նա հանցակցի հետ միասին տեխնիկական զննման դրական եզրակացություն է տվել տեխնիկապես անսարք տրանսպորտային միջոցի համար: Դրա դիմաց, բացի

պաշտոնական վճարից, քաղաքացուց վերցրել է 100 լարի:

Պարզվել է, որ տեխնիկական զննման կենտրոնը համակարգված կերպով կեղծ  եզրակացություններ է տվել անսարք տրանսպորտային միջոցների վերաբերյալ: Այս կապակցությամբ քննչական գործողություններ են իրականացվում:

Քննությունը շարունակվում է Վրաստանի քրեական օրենսգրքի 221-րդ հոդվածի 4-րդ մասի և 362-րդ հոդվածի 1-ին մասի հատկանիշներով, որոնք նախատեսում են չորսից վեց տարվա ազատազրկում: