Մառնեուլիի քաղաքապետարանի կողմից հայտարարված մրցույթի համաձայն՝ տեղական իշխանությունը 4996 լարի արժողությամբ ընթրիք  է կազմակերպել Վրաստանում Իսրայելի դեսպան Հադաս Մեյզադի և այլ հյուրերի համար։

Մառնեուլիի քաղաքապետարանը դեսպանին և հյուրերին հյուրընկալելու համար վարձակալել է (Գամաթկավե) ռեստորանը։ Պարզեցված գնումներում չի նշվում, թե քանի հյուր է ընդունել քաղաքապետարանը։

Պարզեցված գնումների համաձայն՝ Վրաստանում Իսրայելի դեսպանը փետրվարի 19-ին այցելել է Մառնեուլի։ Մառնեուլիի քաղաքապետարանը փետրվարի 20-ին Facebook-ում տեղեկություն է հրապարակել դեսպանի այցի մասին։

«Այցը տեղի է ունեցել «Եփրատ» կրթական ծրագրի աջակցության շրջանակներում։ «Մաշավի» ծրագրի աջակցությամբ և «Քվեմո Քարթլի» Շալոմ ակումբի կողմից կազմակերպված նախագիծը կիրականացվի Մառնեուլիում և Ռուսթավիում, որի շրջանակներում ուսանողները անվճար կսովորեն անգլերեն և վրացերեն լեզուներ։
Դեսպանը նաև հանդիպում է ունեցել Մառնեուլիի քաղաքապետարանի երիտասարդական խորհրդի անդամների հետ, որտեղ քննարկվել են երիտասարդության դերը քաղաքապետարանի կյանքում, կրթական ծրագրերը և այս ուղղությամբ համագործակցության ապագա ծրագրերը։ – Այս մասին ասվում է Մառնեուլիի քաղաքապետարանի հրապարակած հայտարարության մեջ։

Մառնեուլիի մունիցիպալիտետի տեղական իշխանությունները անկախ ԶԼՄ-ներին տեղեկություն չեն հայտնել Վրաստան Իսրայելի դեսպանի այցի մասին։

"Ռադիո  Մառնեուլի"
Թարգմ․ ՝  Մարգարիտա  Միսկարյան