Վրաստանում մարդու իրավունքների և ազատությունների պաշտպանության վիճակի մասին Վրաստանի հանրային պաշտպանի 2024 թվականի զեկույցի համաձայն՝ ծնողների նախաձեռնությամբ երեխաների նշանադրության դեպքերը մնում են վիճակագրությունից և պատշաճ արձագանքից դուրս՝ օրենսդրական անբավարար կարգավորման պատճառով։

Վաղ ամուսնության վնասակար պրակտիկայի վերացումը մնում է կարևորագույն մարտահրավերներից մեկը։

Զեկույցի համաձայն՝ երեխաների ամուսնության դեպքերի վրա աշխատելիս սոցիալական աշխատողները դեռևս ցուցաբերում են անարդյունավետ արձագանք, ինչը պայմանավորված է էթնիկ փոքրամասնությունների համայնքի նկատմամբ նախապաշարմունքներով և կարծրատիպային վերաբերմունքով։

«Խնդիր է նաև մանկության տարիքում հնարավոր ամուսնության փաստերով վարչական վարույթ սկսելը: Վրաստանի ՆԳՆ-ում հետաքննություն է սկսվել անչափահասի հետ ամուսնության դրդապատճառով կատարված 184 հնարավոր հանցագործության վերաբերյալ և 74 խափանման միջոց է ընտրվել: Դատախազության տվյալներով՝ հանցագործության հետևանքով 50 երեխա է ճանաչվել տուժող: 45 անձի նկատմամբ հարուցվել է քրեական գործ»։ -  նշված է Հանրային պաշտպանի զեկույցում

Հանրային պաշտպանի զեկույցում նշվում է, որ երեխաների ամուսնության/նշանադրության ուսումնասիրված դեպքերի համաձայն, իրավապահ մարմինների, ուսումնական հաստատությունների և խնամքի մարմինների աշխատանքում դեռ բացեր կան։

Զեկույցի համաձայն՝ անչափահաս հղիությունների և ծնունդների թվի նվազման նախորդ տարիների միտումը պահպանվել է։

« Առողջապահության ազգային գործակալության տվյալների համաձայն՝ 2024 թվականին գրանցվել է 427 անչափահաս հղի կին, և 365 անձ՝ որպես անչափահաս ծնող (այդ թվում՝ 347 անչափահաս մայր, 7 անչափահաս մայր և հայր, 11 անչափահաս հայր)»։

Զեկույցի համաձայն՝ 2024 թվականին ամուսնության նպատակով  43 աշակերտ , այդ թվում՝ 38 աղջիկ և 5 տղա դադարեցրել են ուսումը։ Հանրային պաշտպանը նշում է, որ վիճակագրական տվյալները կարող են չարտացոլել իրական պատկերը, քանի որ ուսումը թողնելու պատճառները սխալներով են նշվում։

Վրաստանի հանրային պաշտպանը կոչ է անում Վրաստանի կառավարությանը մշակել հաղորդակցման միասնական ռազմավարություն՝ երեխաների ամուսնությունը և դրա հետ կապված հանցագործությունները կանխելու համար։
"Ռադիո  Մառնեուլի"
Թարգմ․ ՝ Մարգարիտա Միսկարյան