Namizədlərin diskriminasiya ilə və qeyri etik təqdimatı – qeyri-hökumət təşkilatları Qaribaşvili tərəfindən Azərbaycanlıların “azəri” şəklində qısaldılaraq qeyd edilməsini belə dəyərləndirirlər
13:34 / 25.03.2019
Bu gün, 25 mart
tarixində “Gürcü Arzusu”nun siyasi şurasının katibi İrakli
Qaribaşvili növbədənkənar seçkilərdə iştirak edəcək namizədləri
təqdim edib.Həmin namizədlər arasında Marneuli meri
vəzifəsinə namizəd Zaur Darğallı da olub.
“Zaurun Kvemo Kartlidə uğurlu iş sahəsində böyük
təcrübəsi var, o, parlaq şəxsiyyətdir, etnik azəridir, bizim
vətənimizin layiqli övladıdır. İnanırıq ki, o, Marneuli
bələdiyyəsindəki işinin öhdəsindən də müvəffəqiyyətlə
gələcək”, – Qaribaşvili Zaur Darğallını təqdim
edərkən qeyd edib.
Mülki İnteqrasiya Fondunun rəhbəri Zaur Xəlilov Qaribaşvilinin
namizədlərin təqdimatı zamanı onun etnik mənsubiyyətinə diqqət
çəkməsini diskriminasiya hesab edir.
“Əgər Qaribaşvili Gürcüstan vətəndaşının etnik
mənsubiyyətini müsbət kontekstdə xatırlatmaq istəyirdisə, o zaman
etnik mənsubiyyəti qeyd etməliydi. Düzdür, ingilis dilində əvvəllər
“azəri” sözünə rast gəlirdik, lakin bu artıq çoxdandır ki, belə
deyil və bir millətin adının qısaldılması diskriminasiya kimi qəbul
edilir”, – Zaur Xəlilov deyir və qeyd edir ki, etnik
mənsubiyyətin vurğulanması inteqrasiya prosesinə mane olan
amildir.
İnsan Hüquqlarının Monitorinqi və Araşdırılması Mərkəzinin (EMC)
bərabərlik siyasəti proqramının rəhbəri Tamta Mikeladze
namizədlərin təqdimatının problemli olduğunu deyir. Belə ki,
bəyanatda bələdiyyələrin real ehtiyacları və hakim partiyanın yerli
icmalarda mövcud olan sistematik sosial problemlərin həlli
istiqamətində siyasi düşüncələri barədə söhbət açılmayıb. Mer
vəzifəsinə namizədlərin təqdimatı zamanı onların siyasi
təcrübələrinə toxunulmayıb, Qaribaşvili tərəfindən Marneuli meri
vəzifəsinə Zaur Darğallının təqdim olunması zamanı isə onun “etnik
azəri” şəklində təqdim olunması isə daha bir problemdir. Tamta
Mikeladzenin sözlərinə görə, belə bəyanat hakim partiyanın etnik
azlıq məsələləri ilə bağlı məlumatının və həssaslığının azlığını
göstərir.
“Belə adlandırma natamam və qeyri-etikdir. Siyasi
şuranın katibi etnik qrupun adını heç olmasa düzgün deməli və
“azərbaycanlı” terminini işlətməli idi. “Gürcüstan azərbaycanlısı”
terminindən istifadə etməsi isə daha yaxşı olardı və bununla da
tarixən Gürcüstanda yaşayan və gürcü mədəniyyəti və sosial mühiti
ilə dərindən bağlı olan bizim həmvətənlərimiz olan azərbaycanlı
icmasının Gürcüstanla bağlılığını vurğulamış olardı”,
– Tamta Mikeladze deyir.
EMC-nin bərabərlik siyasəti proqramının rəhbəri onu da qeyd edir
ki, təqdim olunan namizədlərin heç biri qadın olmayıb ki, bu da
qadınların siyasətdə iştirakı probleminin daha bir sübutudur.