Marneulidə yeni seçkiöncəsi kampaniya mahnısı səslənəcək, ya yox?
14:26 / 26.03.2019
Marneulidə mer seçkilərinə hazırlıqlar artıq başlayıb. “Avropalı
Gürcüstan” və “Gürcü Arzusu” öz namizədlərini təqdim ediblər,
tezliklə isə seçkiöncəsi kampaniyalara start
veriləcək. Küçələrə plakatlar asacaqlar, müxtəlif kəndlərdə
görüşlər keçirəcəklər və çalışacaqlar ki, daha çox seçicinin
rəğbətini qazansınlar.
Marneulidə son illərdə seçkiöncəsi kampaniyalar zamanı musiqi
yazılması tendensiyaya çevrilib. İlk belə hal 2016-cı ilin
Parlament seçkiləri zamanı qeydə alınmışdı. Həmin vaxt bu ilki
seçkilərdə mer vəzifəsi uğrunda mübarizə aparacaq Əhməd İmamquliyev
üçün mahnını Marneulidən olan repçi Afiq Novruzov (Nato)
hazırlamışdı.
Nato
yalnız İmamquliyev üçün mahnı hazırlamamışdı. O, 2017-ci ildə yerli
özünüidarə seçkiləri zamanı Marneulinin keçmiş meri Temur Abazov
üçün də mahnı hazırlamışdı.
Biz Natonun “Gürcü
Arzusu”nun Marneuli meri vəzifəsinə namizədi Zaur Darğallı üçün də
mahnı hazırlayıb-hazırlamayacağı ilə maraqlandıq. O, bizimlə
söhbəti zamanı bildirdi ki, hələlik bu istiqamətdə işləməyə
başlamayıb.
“Zaur mənim çox yaxın dostumdur və əgər lazım gələrsə
onun üçün hər şey edərəm”, – Nato deyir.
Seçkiöncəsi kampaniyalar tezliklə başlayacaq və Marneulidə daha bir
melodiyanın duyulması da istisna deyil.