Əli Bədirov Marneuli meri vəzifəsinə müstəqil
namizəddir.
Bu
barədə məlumatı “Marneuli” radiosu ilə söhbəti zamanı Əli Bədirov
özü də təsdiqlədi və bildirdi ki, gənclərdən ibarət təşəbbüs qrupu
artıq onun namizədliyini irəli sürüb. Təşəbbüs qrupunun üzvləri
Kvemo Kartlidəndirlər.
“Onların sayı ən az beş nəfərdir, on nəfərədək arta
bilər. Bu təşəbbüs qrupunun üzvlərinin əksəriyyəti Marneulidəndir.
Əsasən gənclərdir, lakin bir nəfər ağsaqqal da var”,
– Əli Bədirov dedi.
Bədirov hələlik rəsmi qeydiyyatın elan olunmasını gözləyir ki,
sənədlərini təqdim etsin.
Əli Bədirov Tbilisidə yaşayır. O, 2015-2016-cı illərdə Marneulidə
Nəzarət Xidmətinin hüquqşünası vəzifəsində çalışıb və onun dediyinə
görə, məhz bu vəzifədə çalışarkən kəndlərdə tez-tez sakinlərlə
görüşlər nəticəsində Marneulinin problemləri ilə tanışdır.
Bədirov hal-hazırda vəkil kimi fəaliyyət göstərir və Gürcüstan
Azərbaycanlı Hüquqşunaslar Assosiasiyasının rəhbəridir.
Marneulidə növbədənkənar mer seçkiləri 19 may tarixində
keçiriləcək. Mer vəzifəsi üçün artıq iki namizəd partiyalar
tərəfindən irəli sürülüb. “Gürcü Arzusu”nun namizədi Zaur Darğallı,
“Avropalı Gürcüstan”ın namizədi isə Əhməd İmamquliyevdir.