Sabirkənddə qeyri-qanuni zibilliklər
İstifadə olunmuş iynələr, şüşə və plastik su qabları, qırılmış
şüşələr, köhnə paltar və ayaqqabılar, uşaq bezləri, ölmüş heyvan və
quş qalıqları. Bunların hamısı Sabirkənd küçələrinin birindəki
qeyri-qanuni zibilliyə atılan tullantılarıdır. Həmin zibillik
yaşayış evlərinə 5-10 metrlik məsafədə yerləşir.
Həmin ərazidən keçən zaman isə ətrafa üfunətli qoxunun yayıldığını
hiss edirsən. Kənd sakinləri gün ərzində bu yoldan istifadə edərək
əkin sahələrinə və kənd mərkəzinə gedirlər.
Sakinlər zibilliyin yanından keçən yolla mütəmadi olaraq öz
mal-qaralarını otlaq sahələrinə aparırlar. Onlar mal-qaralarının
həmin ərazidən keçən zaman atılan tullantıları yeyəcəyindən ehtiyat
edirlər.
Yerli sakinlər deyirlər ki, bu mövsümdə qoxu o qədər də hiss
edilmir, lakin yay mövsümündə daha çox hiss olunur.
Bu kənd ərazisində yaranmış yeganə qeyri-qanuni zibilik deyil.
Kəndin digər ərazilərində də bu cür zibil tullantıları
mövcuddur.
Sabirkənddə olan vəziyyət haqqında “Təmiz Marneuli” MMC-nin
direktoru Leri Mumladzenin məlumatı var. O, deyir ki, Sabirkənddə
qeyri-qanuni zibilliklər təmizlənəcək, ancaq nə zaman bunu dəqiq
bilmir. Zibil qutularının əlavə olunması üçün isə 100 000 larilik
tender yaxın vaxtlarda elan olunacaq və kəndlərə paylanacaq.
"Ətraf əraziyə ən az 10 qutu əlavə etməliyik. Bəlkə
yeni qutular aldıq, meriya 100 000 lari ayırıb və imkan daxilində
qutuları artıracağıq. Bunun üçün tender elan olunacaq və təqribən
iki ay vaxt lazım olacaq” - Leri Mumladze deyir.
Qanunsuz yaradılmış zibilliklər yalnız Sabirkəndin problemi deyil.
Marneuli miqyasında təqribən 86 qeyri-qanuni zibillik var və onları
təmizləmək yerli özünüidarənin öhdəliyidir.