Xalq müdafiəçisi Gürcüstanda insan hüquqları
və azadlığın müdafiəsi vəziyyəti ilə bağlı 2018-ci ilin hesabatını
yayımlayıb.
Hesabatda Marneuli bələdiyyəsindən də bəhs olunur. Söhbət konkret
olaraq etnik azlıqların qərarların qəbul olunması prosesində
iştirakından gedir. Hesabatda qeyd olunub ki, qərarların qəbul
olunması prosesində milli azlıqların iştirakının artırılması
istiqamətində hələ də heç bir səmərəli addım atılmır.
“Milli azlıqların yığcam yaşadığı Marneuli
bələdiyyəsində 2018-ci il ərzində milli azlıq nümayəndələri məsul
vəzifələrdə minimal həddə təmsil olunublar. Marneuli meriyasının 8
xidmətindən yalnız birinin rəhbəri milli azlıq nümayəndəsidir,
Bələdiyyə Məclisinin 5 komissiyasından isə heç birinin sədri milli
azlıq nümayəndəsi deyil. Marneuli Bələdiyyə Məclisi Bürosunun 11
üzvündən yalnız biri milli azlıq nümayəndəsidir. Bu misallar milli
azlıqların təmsil olunması və iştirakı baxımından narahatlıq verici
vəziyyəti aydın şəkildə göstərir ki, bu da inteqrasiya məsələləri
ilə bağlı dövlət siyasətinin səmərəliliyini sual altda
qoyur.” – xalq müdafiəçisinin hesabatında qeyd
edilir.
Qeyd olunmalıdır ki, 2014-cü ildə aparılan əhalinin siyahıya
alınmasına görə, Marneuli bələdiyyəsində 104 300 nəfər yaşayır ki,
buradan da 83,77% azərbaycanlılar, 8,58% gürcülər və 6,99%
ermənilərdir.