"Xalq nəzarəti" Marneulidə bir neçə obyekti yoxlayıb
“Xalq nəzarəti” verilişi Marneulidə olub.
Məqsədi qida, iaşə və s. obyektlərdə gigiyena, sanitar və digər
müxtəlif normaların pozuntularının aşkarlanması olan televiziya
verilişi Marneulidə bir neçə obyekti
yoxlayıb.
Marneuli bazarı ərazisi və küçə ticarətçiləri də “Xalq nəzarəti”nin
obyektivinə düşüb. Qeyd olunan problemi “Marneuli” radiosu da
dəfələrlə işıqlandırıb. Süd məhsullarının vizual görüntüsü,
temperatur rejiminin qorunmaması, antisanitariya Marneuli bazarında
qarşılaşa biləcəyiniz problemlərdəndir. Bu problemin aradan
qaldırılması məqsədi ilə Marneuli meriyası bir neçə dəfə küçə
ticarətçilərinə xəbərdarlıq edib, lakin problem bu günə kimi öz
həllini tapmayıb.
Küçədə süd məhsulları satan satıcılardan başqa “Xalq nəzarəti”
bazar ərazisində olan bir neçə bərbərxanaya da baş çəkib. Həmin
obyektlərdə əsasən antisanitariya və binada siqaret çəkilməsi
faktları aşkarlanıb.
Bərbərxanalardan başqa Marneuli bazarı ərazisində yerləşən çörək
bişirilən obyektlərdə də siqaret çəkilməsi halları aşkarlanıb.
Demək olar ki, bu obyektlərdə siqaret çəkilməsi ən yüngül pozuntu
halıdır. Bu obyektlərdə sanitar normalara riayət olunmur, tavan
uçub və keflənib, divar və döşəmədə isə tarakanlar, qarışqalar və
digər həşəratlar gəzişir.
“Xalq nəzarəti”nin çəkiliş qrupu Marneuli 1 saylı uşaq bağçasında
da olub. “Tut bağı” adlanan ərazidə yerləşən bağçada əsas problem
kimi, isti suyun olmaması qeyd olunub. Buna görə də uşaqlar
əllərini, işçilər isə qabları soyuq su ilə yumalı olurlar. Bağçada
əsas problemlərdən biri də ayaqyoludur. Belə ki, burada
havalandırma sistemi qaydasında deyil, unitaz isə cəmi bir
ədəddir.
Veriliş Marneulidəki ən məşhur restoranlardan olan “Qafqaz”
restoranına da baş çəkib. Restoranın meneceri çəkiliş qrupunun
restorana daxil olmasına mane olmağa çalışıb, bu zaman isə
əməkdaşlar mətbəxi yığışdırmağa və qida məhsullarını etiketləməyə
başlayıblar.