Mülki Məşğulluq Mərkəzində mer vəzifəsinə namizədlərin debatı keçirilə bilər
Marneuli Mülki
Məşğulluq Mərkəzi mer vəzifəsinə namizədlərin öz seçki
proqramlarını təqdim edə biləcəyi və seçicilərlə müzakirələr apara
biləcəyi görüşlər təşkil etməyi planlaşdırır.
Görüşdə onlar seçiləcəkləri halda üzərində
çalışacaqları prioritet məsələləri təqdim edəcəklər, görüşün ikinci
hissəsində isə auditoriya tərəfindən səsləndirilən suallara cavab
verəcəklər.
Marneulidə növbədənkənar mer seçkiləri 19 may tarixində
keçiriləcək. Bu vaxta qədər 4 namizədin kimliyi artıq məlumdur.
Seçkilərdə “Güc Birlikdədir”in namizədi Aqil Mustafayev, “Gürcü
Arzusu”nun namizədi Zaur Darğallı, “Avropalı Gürcüstan”ın namizədi
Əhməd İmamquliyev və müstəqil namizəd Əli Bədirov mer vəzifəsi
uğrunda mübarizə aparacaqlar.
Mülki Məşğulluq Mərkəzinin nümayəndəsi Mariam Samxaradzenin
dediyinə görə, mer vəzifəsinə namizədlərlə görüş güman ki, gələn
həftə keçiriləcək. Artıq namizədlərdən ikisi görüşlər üçün razılıq
verib. Digər iki namizədə gəlincə isə onlarla görüşün vaxtı
dəqiqləşdirilir.
Görüşlərdə qeyri-hökumət təşkilatları və mətbuat nümayəndələri,
fəal vətəndaşlar, gənclər və digər maraqlanan şəxslər iştirak
edəcəklər.