Marneulidə
növbədənkənar mer seçkiləri öncəsi kampaniya müddəti rəsmi olaraq 2
həftə əvvəl başlayıb.
Mer
vəzifəsinə dörd namizədin kimliyi artıq məlumdur, lakin Marneuli
sakinlərinin hələ ki, onların proqramı haqqında məlumatları
yoxdur.
“Marneuli” radiosu namizədlərin əsas düşüncələrinin nə olduğunu,
mer seçiləcəkləri halda hansı işləri görəcəklərini və bələdiyyədəki
problemlərlə bağlı fikirlərini öyrənmək üçün bütün namizədlərlə
əlaqə saxladı.
“Gürcü Arzusu”nun namizədi Zaur Darğallının “Marneuli” radiosu ilə
söhbəti zamanı bildirdiyinə görə, onların proqramı böyükdür.
Bələdiyyənin inkişafı ilə bağlı düşüncələrinə gəlincə isə, bu
barədə onun namizədliyinin rəsmi təqdimatından sonra geniş şəkildə
danışacaq.
Müstəqil namizəd Əli Bədirov və birləşmiş müxalifət “Güc
Birlikdədir”in namizədi Aqil Mustafayevin seçki proqramları hələ
hazır deyil.
Əli Bədirov “Marneuli” radiosuna bildirdi ki, namizədliyinin qeydə
alınması üçün imza toplamaqla məşğul olduqlarına görə, proqram
üzərində işləyə bilməyiblər və onun proqramı gələn həftə, güman ki,
Marneuli Mülki Məşğulluq Mərkəzi keçiriləcək görüşədək hazır
olacaq.
Birləşmiş müxalifətin namizədi Aqil Mustafayev bildirdi ki, proqram
üzərində işlər davam edir və günün sonunadək göndərəcəyini vəd
etdi.
“Avropalı Gürcüstan”ın Marneuli meri vəzifəsinə namizədi Əhməd
İmamquliyevə gəlincə isə, o, bildirdi ki, proqramının çap versiyası
kitabça və broşüralar hazırlandıqdan sonra məlum olacaq. Onun
dediyinə görə, prioritet məsələlərdən biri kəndlərdə idman
həyatının inkişafı olacaq ki, bunun üçün də bütün kəndlərdə idman
zalları və futbol meydançaları yaradacaqlar. Fiziki məhdudiyyətli
insanlar üçün bələdiyyə nəqliyyatlarında gedişin pulsuz olması,
tələbələr üçün meriyada təcrübə keçmək imkanı, meriyada işə
kadrların qəbulu prosesinin şəffaflığı, kəndlərdə və icmalarda uşaq
bağçalarının tikilməsi və ya təmiri və kəndlərdə içməli su və yol
probleminin həlli də onun planlarına daxildir.