Namizədlərlə görüşdə vətəndaşların suallarının əksəriyyəti meriyada yerli kadrların azlığı ilə bağlı idi
Bu gün, 24 aprel
tarixində Marneuli Mülki Məşğulluq Mərkəzində mer vəzifəsinə
namizədlərlə görüş keçirildi.
Görüşə Marneuli meri vəzifəsinə 15 namizəddən
dördü dəvət edilmişdi, lakin “Vahid Milli Hərəkat – Birləşmiş
müxalifət”in namizədi Aqil Mustafayev görüşdə iştirak etmədi.
Görüşdə müstəqil namizəd Əli Bədirov, “Gürcü Arzusu”nun namizədi
Zaur Darğallı və “Avropalı Gürcüstan”ın namizədi Əhməd İmamquliyev
iştirak edirdi.
Görüşün formatına əsasən namizədlərdən hər birinə hər suala cavab
üçün 3 dəqiqə vaxt verilirdi. Namizədlər görüşdə vətəndaşların
iştirakı, həssas qrupların – gənclərin və qadınların ehtiyacı,
bələdiyyədə sosial proqramlar və məhdud fiziki imkanlı şəxslər,
bələdiyyənin iqtisadi inkişafı ilə bağlı düşüncələri barədə
danışdılar.
Namizədlər qeyd olunan mövzularla bağlı öz düşüncələrini
bildirdikdən sonra görüş iştirakçıları da onlara sual ünvanladı.
İştirakçıların sualları əsasən Marneuli meriyasında işlə təmin
olunma siyasəti ilə bağlı idi. İştirakçıların bir qismi Marneuli
meriyasında yerli kadrların çalışmamasına narazılıqlarını
bildirdilər.