Bu gün, 12 noyabr tarixində Mülki İştirak və
Fəallıq Mərkəzinin və “Marneuli” radiosunun birgə layihəsi olan
“Şəffaf büdcə üçün milli azlıqların səmərəli iştirakı” layihəsi
çərçivəsində keçirilmiş “Marneuli bələdiyyəsində yaşayan gənclərin
ehtiyacları” araşdırmasının hesabatının təqdimatı
keçirildi.
Mülki İştirak və Fəallıq Mərkəzinin rəhbəri Rəşan Ziyadəliyev
bizimlə söhbəti zamanı bildirdi ki, araşdırma nəticəsində əsasən
dörd problem müəyyən olunub.
“Gəncləri narahat edən problemlər əsasən nəqliyyat,
vaxtlarını keçirə biləcəkləri yerlərlə bağlıdır. Bu problem daha
çox kəndlərdə yaşayan gəncləri narahat edir, belə ki, kəndlərdə
gənclərin dərslərdən sonra toplaşa biləcəyi yerlər yoxdur.
Araşdırma nəticəsində vurğulanan digər bir problem isə
tullantılarla bağlıdır. Bu problem də gənclərin, ümumiyyətlə
Marneulinin əsas problemlərindəndir. Gənclər Marneuli meriyası ilə
ünsiyyətin kifayət qədər olmamasını da problem kimi vurğulayıblar
və qeyd ediblər ki, onların fikirləri, müraciətləri, hər hansı bir
məsələ ilə bağlı ərizə ilə müraciət etmələri heç bir nəticə
vermir”, – Rəşan Ziyadəliyev deyir.
Araşdırmanın nəticələrinin təqdimatından sonra görüş Marneuli meri
Zaur Darğallı ilə müzakirə şəklində davam etdi. Müzakirənin əsas
mövzusu Marneuli gənclərinin ehtiyacları və yerli hakimiyyətin
2020-ci il üçün planlaşdırılan layihələrində gənclər istiqaməti
idi.