Marneulidə yaşayan jurnalist və mülki fəal
Jozef Aleksander Smit “Lelo” platformasına
qoşulub.
Smitin “Marneuli” radiosu ilə söhbəti zamanı bildirdiyinə görə, o,
ölkədə həqiqi dəyişikliyə nail olunması üçün “Lelo”ya üzv olub.
“Bu komandada kifayət qədər təcrübə, peşəkarlıq, bilik
olduğunu gördüm, bundan başqa mənim üçün layiqli əmək şəraiti,
layiqli əməkhaqqı, ekologiya və digər mövzular da çox mühümdür və
mən bütün bunları hərəkatın liderlərində gördüm”, –
Jozef Aleksander Smit deyir.
“Lelo” vətəndaş hərəkatı 12 sentyabr 2019-cu ildə “TBC Bank”-ın
təsisçiləri və keçmiş rəhbərləri Mamuka Xazaradze və Badri
Caparidze tərəfindən təsis olunub. “Platformanın təsisçiləri
bildirirdilər ki, gələcəkdə siyasi partiya da yaradacaqlar.
Radiomuzla söhbəti zamanı Smit bildirdi ki, o, siyasi partiyaya da
üzv olmağı düşünür.
Jozef Aleksander Smit Marneuliyə bir neçə ay əvvəl köçüb. Onun
sözlərinə görə, şəhərlərarası nəqliyyat probleminə baxmayaraq
Marneulidə qalmağı və burada çalışmağı planlaşdırır.
“Mən düşünmürəm ki, bu hərəkat öz işi ilə ancaq bir regiona
yönələcək. Aydındır ki, yeni üzvlərin əksəriyyəti Tbilisidə
yaşayır. Düşünürəm ki, mən regionda yaşayan yeganə üzvəm, lakin
“Lelo”nun hazırda ictimai hərəkat, gələcəkdə isə siyasi partiya
olaraq çalışdığı sahələr ölkə üçün mühüm
məsələlərdir”, – Jozef Aleksander Smit deyir.
Smitin sözlərinə görə, “Lelo” üzvlərinin yanaşmaları digər siyasi
partiyalardan fərqlənir və onlar Marneuli və digər regionların
insanları ilə etnik azərbaycanlı kimi deyil, Gürcüstan vətəndaşı
kimi danışmağı düşünürlər.
Mamuka Xazaradze Jozef Aleksander Smit və 11 yeni üzvü bu gün, 15
noyabr tarixində təqdim etdi. Smit Mamuka Xazaradzenin 12 dekabrda
təqdim edəcəyi “Lelo” partiyasına da üzv olacaq.