Təbii fəlakətdən zərər çəkmiş 81 vətəndaşın torpaq vergisini bu il meriya ödəyəcək
Meriya 81 nəfər
Marneuli sakinini torpaq vergisindən azad
edəcək.
Bu
haqda 15 noyabrda baş tutan Bələdiyyə Məclisinin iclasında məlum
olub. Merin müavini Laşa Lobjanidzenin dediyinə görə, Marneulidə
iyulda baş vermiş təbii fəlakət zamanı məhsuluna 50%-dən artıq
zərər dəyən vətəndaşlar sadəcə bu il torpaq vergisindən azad
olunacaqlar.
“Təbii fəlakət nəticəsində dəymiş zərərə görə
qanunvericilik bizim tərəfimizdən arayış verməyi tələb edir ki,
həqiqətən də fəlakətə görə bu zərər dəyib. Ümumilikdə yerli
büdcədən ayrılan məbləğ 46 000 lari təşkil edir. Təbii fəlakət
zamanı işçi qrupu yaradıldı və qrup bu məsələni araşdıracaq. Orada
torpaq vergisindən azad olunmaq istəyən daha çox adam var idi.
Ancaq qanunvericiliklə nəzərə alınıb ki, zərərin səviyyəsi 50
faizdən artıq olmalıdır”,-Laşa Lobjanidze
bildirir.
Güclü fəlakət iyul ayında Marneulinin Xixani, Şaumyani, İmir,
Tsitelsopeli və Saimerlo kəndlərinə əhəmiyyətli dərəcədə zərər
vurdu. Qeyd edək ki, Marneulidə iyul ayında üç dəfə fəlakət qeydə
alınıb. Dolu evlərin dam örtüyünə zərər vurdu və məhsulun əksər
hissəsini məhv etdi. Marneuli miqyasında isə yalnız bir fermer öz
məhsulunu sığorta etdirmişdi.
Bələdiyyədə 12 iyulda zərəri hesablayacaq komissiya yaradıldı və
onun üzvlərindən biri Ətraf Mühitin Mühafizəsi və Kənd Təsərrüfatı
Nazirliyinin Kvemo Kartli İdarəsinin baş mütəxəssisi Pavle
Sivsivadze idi. O, deyir ki, məhsulun sığortalanması bir növ
vərdişə çevrilməlidir, ancaq Marneulidə başqa reallıq
qarşısındayıq.
“Kənd təsərrüfatı sığortasız olmaz. Bu gün bizim
bələdiyyədə vəziyyət başqadır, əsasən torpaq sahələri qeydiyyatdan
keçməyib və ona görə də sığortalamaq mümkün deyil. Yaxud uzun
müddətə icarəyə verilib. Çalışmalıyıq ki, birinci növbədə
qeydiyyatdan keçirək və sonra isə bu məsələni fermerlərə çatdıraq
ki, kənd təsərrüfatında sığortasız məhsul götürmək mümkün olmur.
Meriyanın onlara (fəlakətdən zərər çəkənlərə) başqa cür vəsait
ödəmək hüququ yoxdur. Yalnız torpaq vergisindən azad edə bilər. Bu
kiçik məbləğdir, hektara təqribən 100 laridir və hektarlarla
zərərin qarşısında bu kiçik məbləğdir”, - Pavle
Sivsivadze deyir.
Bələdiyyə Məclisinin bugünkü iclası növbədənkənar idi və iclasda
gündəlik qrafikə əsasən yalnız bir məsələ nəzərdə tutulmuşdu. Qeyd
olunan məsələ ilə bağlı deputatlar yekdilliklə müsbət qərar qəbul
etdilər.