Marneuli yerli özünüidarəsində əməkhaqlarının ümumi miqdarı 2019-cu illə müqayisədə 352 300 lari artacaq
Marneuli Bələdiyyə Məclisi 2020-ci ilin büdcə
layihəsini yayımlayıb.
Marneulinin 2020-ci il büdcə layihəsinə görə,
əməkhaqlarının ödənməsi üçün 4 117 800 lari xərclənəcək. 2019-cu
ilin büdcəsində isə bu məqsədlə 3 765 500 lari ayrılmışdı.
Marneuli meriyasının Maliyyə-Büdcə Xidmətinin rəhbəri Vüqar
Məmmədovun “Marneuli” radiosuna bildirdiyinə görə, 2020-ci il
büdcəsində əməkhaqlarının ümumi miqdarının artması bələdiyyədə iş
yerlərinin sayının artması və müəyyən vəzifələr üçün əməkhaqqının
artırılması ilə əlaqədardır.
“İş yerlərinin sayı artırılıb, lakin hələlik vakansiya elan
olunmayıb. Ştatların artırılması isə büdcə arealının artırılması
ilə bağlıdır. Büdcə əvvəllər 25, 26, 30, 31 milyon idi, indi isə 45
milyondur və müvafiq olaraq gələn ildə də artırılacaq.
İnfrastruktur layihələr artırılır, kəndlərə dəstək layihəsi 2019-cu
ildə bərpa olundu və gələn il də davam edəcək, məktəblərin bərpası
da bizə həvalə olunub, uşaqların daşınması da bizə həvalə olunub,
yəni büdcənin əhatə dairəsi genişlənib və müvafiq olaraq iş yerləri
də artırılıb”, – Vüqar Məmmədov deyir.
Əməkhaqlarının ümumi miqdarı 2019-cu illə müqayisədə 2020-ci ildə
352 300 lari artırılıb.
Marneuli bələdiyyəsinin 2020-ci il büdcəsi bu gün, 19 noyabr
tarixində saat 15:00-da Bələdiyyə Məclisinin iclasında müzakirə
ediləcək.
"Marneuli" Radiosu