Həmrəylik Platforması Zaza Abaşidzenin istefasını tələb edir
Fərqli etnik və dini qrupların fəallarını bir araya gətirən
“Həmrəylik Platforması” açıq irqçi açıqlamasına görə Zaza
Abaşidzenin Milli Əlyazmalar Mərkəzindən
uzaqlaşdırılmasını tələb edir. Zaza Abaşidze yazdığı senzuradan
kənar sözlərə görə 4 may tarixində üzr istəyib, lakin ayrı-seçkilik
ittihamını rədd edib.
Həmrəylik Platforması Milli Əlyazmalar Mərkəzinin direktoru Zaza
Abaşidzenin ksenofobiya xarakterli açıqlamasına münasibət bildirib
və Gürcüstanın Təhsil, Elm, Mədəniyyət və İdman nazirini onu
vəzifəsindən uzaqlaşdırmağa çağırır.
“Zaza Abaşidze 2 may tarixində “Facebook”-da Bolnisinin Dəllər
kəndində baş vermiş hadisələri şərh edərkən Gürcüstanın
azərbaycanlı icmasına qarşı "kəndi bağlayıb öldürmək lazımdır"
ifadələrini işlədib. Dövlət məmuru tərəfindən ictimai məkanda belə
nifrət dilindən istifadə olunması yolverilməzdir və ictimaiyyətdə
ksenofobiya xarakterli və irqçi münasibətlərin yaranmasına xidmət
edir. Kvemo Kartli bələdiyyələrinin inzibati sərhədlərinin
bağlanmasından sonra Gürcüstanın azərbaycanlı icması bir daha
nifrət dili obyektinə çevrildi, dövlət məmuru tərəfindən belə
bəyanatların verilməsi Gürcüstanın azərbaycanlı icmasına qarşı
irqçi əhval-ruhiyyəni daha da qızışdırır və ədalətli,
bərabərhüquqlu və inkluziv cəmiyyət quruculuğu və inteqrasiya
prosesinə mane olur.
Yüksək səviyyəli siyasi məmurların bu cür açıqlamalara münasibət
bildirməsi və cəmiyyətdə bərabərlik və həmrəylik ideyasını açıq
şəkildə dəstəkləməsi çox mühümdür. Əks təqdirdə, hökumətin
susqunluğu irqçilik və ksenofobiyaya dözümlülük kimi qəbul edilə
bilər və bu, dominant olmayan etnik qruplara zərərli təsir
göstərəcəkdir.
"İnanırıq ki, dominant olmayan etnik və dini qruplara qarşı bu cür
bəyanatların artmasının və yayılmasının qarşısını almaq üçün
hökumət müvafiq cavab verməli və Zaza Abaşidzeni dərhal
vəzifəsindən azad etməlidir. Bununla bərabər Zaza Abaşidze irqçi
ifadələrinə görə açıq şəkildə üzr istəməlidir."
Həmrəylik Platforması fərqli etnik və dini qruplara məxsus fəalları
özündə birləşdirir və fərqli sosial qruplar arasında dialoq,
həmrəylik və dominant olmayan qrupların ehtiyaclarını,
narahatlıqlarını və perspektivlərini siyasi gündəmə gətirmək
məqsədi daşıyır", – deyə açıqlamada qeyd olunub.