“Avropalı Gürcüstan”ın liderlərindən olan Qiqi Uqulavanın sözlərinə
görə, iyunun 20-də real bir yerdə aksiya keçiriləcək,
amma pandemiyaya görə bunun hansı formatda olacağı məlum deyil. Bu
haqda Qiqi Uqulava jurnalistlərə birləşmiş müxalifətin görüşündən
sonra məlumat verib.
“İyunun 20-də aksiyanın keçirilməsi tamamilə
məntiqlidir, düzgündür və mənəvi olaraq da, siyasi olaraq da
doğrudur. Bununla yanaşı, bu pandemiya sonrası və ya pandemiya
dövründə sağlam düşüncəyə yaxın olan qaydaların hamısını
qorumalıyıq. Ölkə yaşamağa davam edir, bu pandemiyaya görə etiraz
formaları dəyişə bilər, amma əsas nüvə dəyişməyəcək, hisslər
dəyişməyəcək ki, buna görə də yeni standart
lazımdır”.
Onun sözlərinə görə, 20 iyun aksiyası hansısa nöqteyi-nəzərdən
eksperimental olacaq – “yeni reallığa uyğunlaşdırmalıyıq, amma
məzmunu dəyişməz qalmalıdır”.
“Məzmun yenə də işğaldan azad edilmə tələbidir,
dəyişikliklər tələbidir və indi daha bir kəskin tələb də artacaq:
böhran əleyhinə ruh yüksəkliyi. Çünki, hamımız başa düşürük ki,
iqtisadiyyat tufanı qopacaq. Bu tufan qopanda isə hakimiyyəti də,
xalqı da sürükləyib apara bilər və hamımızı qarşıda günlərlə,
aylarla və illərlə çətin günlər gözləyə bilər. Məhz buna görə də 8
mart razılaşmasının yerinə yetirilməsi vacibdir. Ona görə vacibdir
ki, heç olmasa minimal səviyyədə həm beynəlxalq tərəfdaşlar
tərəfindən, həm də cəmiyyətimiz tərəfindən inam olsun. Hökumət
verdiyi sözün qiymətini bilməlidir. Bu gün artıq onun sözünün
qiyməti yoxdur, bu isə onların problemidir. Buna görə də 20 iyun bu
yeni enerjinin, yenilənmənin və köhnə problemlərin unudulmaması
günü olacaq”, – deyə Uqulava bildirib. Uqulavanın
bildirdiyinə görə, aksiyanın təfərrüatları ilə bağlı birləşmiş
müxalifət müxtəlif ictimai təşkilatlarla məsləhətləşmələr
aparacaq.
20 iyunla bağlı Qiqa Bokeria da şərh verib. O, bildirib ki, bu
tarixin qeyd olunması mütləq baş tutacaqdır, amma dəqiq hansı
formada olacağı bu mərhələdə məlum deyil. İrakli Okruaşvilinin
sözlərinə görə isə, birləşmiş müxalifətin nümayəndələri bu gün
keçirilən görüşdə “20 iyunda keçirilə biləcək aksiya” haqqında
danışıblar.
“20 iyun istənilən halda qeyd olunası tarixlərdəndir.
Onun qeyd olunması ictimai maraqlara uyğun şəkildə həyata
keçirilməlidir. İyunun 20-də gürcü ictimaiyyəti bizim əsas
düşmənimizin – Putinin təcavüzünə və bizim hökumətin ən azı
məsuliyyətsizliyinə cavab verdi və Gürcüstanın maraqlarını qorudu.
Buna görə də bu tarix bu və ya digər formada mütləq qeyd
olunmalıdır”, – deyə Bokeria bildirib.
Müxalifət partiyaların liderləri mayın 18-də Leyboristlər
Partiyasının ofisinə toplaşaraq görüş keçiriblər. Görüşdə majoritar
siyahılar, 20 iyunda keçirilə biləcək aksiya və Qiorqi Ruruanın
azad edilməsi məsələləri müzakirə olunub. Müxalifət partiyalarının
nümayəndələrinin sözlərinə görə, onlar razılıq əldə edə biliblər və
birgə bəyanat yayımlayacaqlar.