Bir il əvvəl məhz bu gün, 19 may tarixində Marneulidə
növbədənkənar seçkilər keçirildi. Səs çoxluğunu iqtidar
partiyasının namizədi Zaur Darğallı qazandı.
O, 2019-cu il 10 iyun tarixindən öz səlahiyyətlərinin icrasına
başlayıb. “Marneuli” radiosu seçkilərdən düz bir il sonra merlə
müsahibə yazıb. Biz ondan, bir il ərzində Marneulidə olan
problemlərdən və nailiyyətlərdən danışmasını xahiş etdik. Mer əsas
problem olaraq içməli su və yol infrastrukturunu qeyd etdi.
“Algeti kəndində 13 kilometrlik su sisteminin qurulması
əhəmiyyətlidir. Bu bizim verdiyimiz vəd idi və artıq layihə həyata
keçirilir. Eləcə də yol olmayan kəndlərdə asfalt qatının çəkilməsi
vacib idi. İndi altı kənddə bu istiqamətdə işlər aparılır və mənim
məqsədim mərkəzi yolların məsələsini başa vurmaqdır. Sosial və
gənclər paketinin gücləndirilməsi, əhalinin büdcənin qəbul edilmə
prosesində iştirakı olduqca əhəmiyyətli idi. Həmçinin, fiziki
imkanları məhdud şəxslər üçün yeni proqramımız var və bu
istiqamətlər gücləndirildir. Ancaq pandemiyaya görə
dayandırılmışdı. Amma bu proqramlar qəbul olunub və həyata
keçirilir”, – Zaur Darğallı deyir.
Marneuli meri əsas məsələlərdən biri olaraq əhali ilə açıqlıq və
səmimiliyini, fəal ünsiyyətini qeyd edir.
“Mən vəd vermişdim ki, hər gün Marneulilərlə birgə
olacağam və bu vəd də yerinə yetirildi. Hər bir Marneuli sakini
üçün dost kimi, Marneulili kimiyəm. Vətəndaş və məmur arasında heç
bir baryer yoxdur. Bilmirəm nə dərəcədə məlumatlısınız, ancaq demək
olar ki, bütün Marneulilərdə mənim telefon nömrəm var. Əsas odur
ki, bu güclü ünsiyyətdir”, – Zaur Darğallı deyir.
Zaur Darğallı əhaliyə tibbi baxımdan yardım olunmasını vacib məsələ
hesab edir və vəd verir ki, 2021-ci ilə qədər seçki vədlərinin
hamısını yerinə yetirəcək.
“Mənim üçün bir Marneulili kimi vacib olan odur ki,
merliyim başa çatdıqdan sonra Marneulidə qaldıqda əhali qarşısında
təmiz olum və deyə bilim ki, əhaliyə verdiyim bütün vədlər yerinə
yetirildi”, – Zaur Darğallı deyir.
Seçki qabağı çox vədlər verildi, onlara qeyri-gürcü dilli əhali
üçün bələdiyyədə baş verən hadisələrin əlçatanlığı və meriyanın
fəaliyyətinə qoşulmaq məqsədi ilə Marneuli meriyasında xüsusi
xidmətin yaradılması, uşaq bağçaları və idman meydançalarının
tikintisi, kəndlərdə daxili yolların, küçələrin işıqlandırılmasının
və içməli su və.s problemlərin həlli də yer alırdı. Zaur
Darğallının 2021-ci ilin yerli özünüidarə seçkilərinə qədər
təxminən il yarım vaxtı qalıb. Marneulilərin isə çox sayda ehtiyacı
və yüksək gözləntiləri var.