"Avropalı Gürcüstanda" partiya rəsmilərinə də təsir edə
biləcək struktur dəyişiklikləri planlaşdırılır.
"Avropalı Gürcüstan"-ın lideri Davit Bakradzenin sözlərinə görə,
partiya hələ də gələcək planları və struktur dəyişikliklərini
müzakirə edir.
"Bütün digər canlı orqanizmlər kimi, siyasi partiyanın
da daim yenilənməsinə ehtiyac var. Bu gün ictimai əhval-ruhiyyə çox
aydındır - yalnız "Avropalı Gürcüstan" deyil, bütün müxalifət
spektri yeni baxış və dəyişikliklər gözləyir. Hazırda "Avropalı
Gürcüstan" da müzakirələr gedir, bu səbəbdən bu gün şəxsi və ya
kadr qərarları ilə bağlı heç bir qərarı açıqlaya
bilmərəm", - deyə Bakradze bildirib.
Onun sözlərinə görə, partiyadaxili dəyişikliklər nə olursa olsun,
partiyanın ümumi müxalifət mübarizəsi və parlamentin boykot
məsələsinə təsir göstərməyəcək.
Bakradzenin sözlərinə görə, ictimaiyyət yaxın üç gündə şəxsi
qərarlar və partiya daxilində baş verən konkret bölüşdürmələrdən
xəbərdar olacaq.
On.ge-nin fevralın 9-da partiyanın planlaşdırılan dəyişiklikləri və
Davit Bakradzenin "Avropalı Gürcüstan"-dan mümkün gedişi barədə
verdiyi məlumatdan sonra partiyanın mətbuat xidməti Davit
Bakradzenin açıqlamasını yayımlayıb. Eyni zamanda, "TV Pirveli"-nin
verdiyi məlumata görə, bir neçə gün əvvəl Qiqi Uqulava Ukraynaya
səfəri zamanı keçmiş prezident Mixail Saakaşvili ilə görüşüb və bu,
partiyadakı mübahisələrin səbəblərindən biri olub.
"Netgazeti" Qiqi Uqulava ilə əlaqə qurmağa çalışıb, ancaq o,
zənglərə və mesajlara cavab verməyib. "Avropalı Gürcüstanın" digər
liderləri Uqulavanın bu səfərinin şəxsi olduğunu və siyasi
olmadığını və partiya içində mübahisələrə səbəb olmadığını
söyləyirlər.
“Qiqi xaricdə idi, ölkədən getməsi ilə bağlı bəzi
qarışıqlıqlar yarandı. Bütün qanunları və məntiqləri pozaraq onun
xaricə çıxmasını qadağan edirdilər. Bu onun şəxsi səfəri idi,
siyasətlə heç bir əlaqəsi yox idi. Kimlə və necə görüşdüyünü
Qiqidən soruşmalısınız, amma mən görüşmələrində də heç bir problem
görmürəm", - deyə Levan Tarxnişvili "Netgazeti"-yə
bildirib.
Serqi Kapanadze də partiyadakı mübahisələri rədd edib.
"Uqulava ilə Saakaşvili arasındakı görüş haqqında
məlumatım yoxdur və bunun baş verdiyini düşünmürəm, amma partiyada
bu səbəbdən heç bir mübahisə olmayıb", - deyə
Kapanadze bildirib.
Partiya sədrinin dəyişdirilməsi məsələsinin gündəmdə olub-olmadığı
ilə bağlı suala cavab olaraq Serqi Kapanadze struktur
dəyişikliklərinin olacağını və konkret bir mövqedən danışılacağını
söyləyib.
Parlament seçkilərindən sonra Elene Xoştariya artıq "Avropalı
Gürcüstanı"-nı tərk edib.
“Hər seçkidən sonra bütün partiyalar baş verənləri
təhlil edir ki, nə alındı, nə alınmadı və s. Eyni şey bu
seçkilərdən sonra "Avropalı Gürcüstanda" da baş verir. Üstəlik, bu
seçki nəticəsində tamamilə fərqli bir reallığa sahib olduq və
siyasi ağırlıq mərkəzi parlamentdən kənarlaşdı. Bu yeni reallıq
partiyanın həll etməli olduğu yeni çətinliklər
yaradıb", - deyə Levan Tarxnişvili bildirib.