Marneuli Təhsil Resurs Mərkəzinin səlahiyyətlərini icra edən
Zabil Qocayev Daxili İşlər Nazirliyinin Kvemo Kartli Polis
Departamentinin Marneuli Rayon Polis İdarəsinin əməkdaşları
tərəfindən aparılan operativ istintaq tədbirləri nəticəsində şəxsi
həyatın toxunulmazlığını pozma ittihamı ilə saxlanılıb.
Daxili İşlər Nazirliyi tərəfindən yayımlanmış məlumata əsasən,
törədilmiş cinayətə görə 4 ildən 7 ilə qədər azadlıqdan məhrumetmə
cəzası nəzərdə tutulur.
Zabil Qocayev Marneuli Resurs Mərkəzinin rəhbəri səlahiyyətlərinin
icraçısı vəzifəsinə bir həftə əvvəl təyin olunmuşdu. 9 iyun
tarixində aydın olub ki, o, vəzifəsindən istefa verib.
Marneuli Təhsil Resurs Mərkəzindən bildirdilər ki, Qocayev
vəzifəsini öz istəyi əsasında, ərizə yazaraq tərk edib. Rəhbər
səlahiyyətlərini isə Əli Qəhrəmanov icra edəcək.
Zabil Qocayev Marneuli Təhsil Resurs Mərkəzinin rəhbəri
səlahiyyətlərini icraçısı vəzifəsinə 2 iyun tarixində təyin
olunmuşdu. Həmin vaxt Təhsil Nazirliyindən “Marneuli” radiosuna
bildirmişdilər ki, Qocayev rəhbər səlahiyyətlərini altı ay ərzində
icra edəcək.
Qeyd edək ki, Marneuli Təhsil Resurs Mərkəzinin rəhbəri vəzifəsini
son bir neçə il ərzində Kənan Ömərov icra edirdi. O, indi merin
müavinidir.