2021-2022-ci tədris ilində Marneuli bələdiyyəsindəki 74 ictimai
məktəbdə birinci sinfə 1800-ə yaxın şagird qeydiyyatdan keçib.
Onlar üçün ilk zəng evlərində çalınacaq və təhsilə onlayn rejimdə
başlayacaqlar. Marneuli Təhsil Resurs Mərkəzindən bildirdilər ki,
Təhsil Nazirliyi onların hamısına kompüter verəcək.
Marneuli bələdiyyəsinin Ağqula ictimai məktəbində birinci sinif
şagirdi olmayacaq. Qeyd olunan məktəbdə bu il 6 nəfər birinci sinif
şagirdi qəbul edə bilərdi, lakin bu məktəbə heç kəs qeydiyyatdan
keçməyib.
Gürcüstan miqyasında məktəblərdə təhsil prosesi 15 sentyabr
tarixində distant qaydada başlayacaq. Bu barədə qərarı 31 avqust
tarixində Qurumlararası Şura ölkədə yaranmış ağır epidemioloji
vəziyyətə görə qəbul edib. Təhsil müəssisələri 4 oktyabr tarixinə
qədər onlayn təhsil rejimini davam etdirəcəklər.