Əhali ilə keçirilmiş geniş miqyaslı 27 görüş, 15 baner, broşürlar
və televiziya reklamları “Gürcü Arzusu”-nun Marneulidə seçkiqabağı
kampaniyasının statistikasıdır.
Bələdiyyədə peyvənd başlayan gündən 2 baner və 17 oktyabrdan 25
oktyabr tarixinə qədər olan dövrdə 404 nəfər peyvənd olunmuş şəxs –
bu isə koronavirusa qarşı peyvənd prosesinin nəticəsidir. Yerli
İctimai Səhiyyə Xidməti Marneulidə peyvənd vurduranların dəqiq sayı
barədə bizə məlumat vermir. Hakim partiya 19 avqust tarixindən,
bələdiyyədə seçkiqabağı görüşlərin keçirilməsinə başlamışdı. Mer
vəzifəsinə namizəd, bütün inzibati vahidliklərə getdi, əhalini
majoritar deputatlığa namizədlərlə tanış etdi, onların
problemlərini dinlədi və mer seçiləcəyi təqdirdə problemləri həll
edəcəyinə dair vəd də verdi. Meriya əməkdaşları peyvəndlə bağlı
neçə kəndə gediblər, yaxud neçə yerdə vətəndaşların mütəxəssislərlə
görüşünü təşkil ediblər, bu barədə rəsmi statistika yoxdur.
Hakimiyyətin seçkilərə, vətəndaşların peyvənd olunmanın mütləq
olmasına inanması üçün hansı güc və resurs xərclədiyini araşdırmağa
çalışdıq. Bu vətəndaşların yaşamı və sağlamlığı ilə bağlı
konstitusiya hüququnu təmin edir.
Marneulidə peyvəndlə əlaqədar sonuncu, məlumatlandırıcı kampaniya
16 avqust tarixində keçirilib. O zaman Gürcüstanın Barışıq və
Vətəndaş Bərabərliyi Məsələlərində Dövlət Naziri Aparatının
əməkdaşları, Marneuli meriyasının köməyi ilə kəndlərdə məlumat
broşürları paylamışdılar. Əsas məqsəd peyvəndə çağırış və əhalini
koronavirusdan qorunmaq mexanizmləri ilə tanış etmək idi. Nazir Tea
Axvlediani Tsopi kəndində yerli əhali ilə görüşərək onlara məlumat
broşüru ilə yanaşı tibbi maskalar vermişdi. Bu görüşlə də peyvəndlə
bağlı məlumat vermə prosesi başa çatdı. Mer nümayəndələrinə
verilmiş həmin məlumat broşürları isə kəndlərin əksəriyyətində
yaşayan sıravi vətəndaşlara gedib çatmayıb. Onların əksəriyyəti ya
inzibati binada, çayxanada yaxud da kəndin “birjasında” qalıb.
Dövlət naziri Tea Axvlediani isə iddia edir ki, Barışıq və Vətəndaş
Bərabərliyi Məsələlərində Dövlət Naziri Aparatı, xüsusilə də
əhalinin dövlət dilində danışa bilmədiyi yerlərdə, koronavirusa
qarşı peyvənd barədə məlumat yayılması prosesinə fəal şəkildə
qoşulub.
Marneuli bələdiyyəsinin yerli özünüidarəsi şəhərə, əhalini peyvəndə
çağıran iki baneri, cari ilin iyun ayında yerləşdirib.
“Bələdiyyə “Alma” MMC ilə bağladığı müqavilə əsasında banerləri
quraşdırıb ki, əhali ümumi peyvənd barədə banerdən məlumat əldə
etsin. Bundan əlavə, Barışıq və İnteqrasiya Nazirliyi ilə razılaşma
əsasında, onlardan peyvəndlə bağlı gürcü, Azərbaycan və erməni
dillərində flayerlər aldıq. Flayer əhali nəyi bilməlidir və
koronavirus hallarının sayını necə azalda bilərik kimi məsələlərə
aiddir. Bizim əməkdaşlarımız həmin flayerləri kəndlərdə
payladılar”- Marneuli mer səlahiyyətlərini icra edən Zaur Tabatadze
“Marneuli” radiosu ilə söhbəti zamanı bildirdi.
Zaur Tabatadzenin sözlərinə görə, o, və meriyanın digər əməkdaşları
peyvənd barədə əhalinin məlumatlandırılmasında “Marneuli”
televiziyasının efirindən fəal şəkildə yararlanırlar.
Doğrudur, Marneuli mer səlahiyyətlərini icra edən şəxs iddia edir
ki, bələdiyyədə koronavirusa qarşı kampaniya fəal şəkildə aparılır
və seçkiqabağı dövrdə də aparılırdı, ancaq, nəticə tam başqa şey
göstərir. İctimai Səhiyyə Mərkəzinin rəhbəri Eter Laperadze
“Marneuli” radiosu ilə söhbəti zamanı bildirdi ki, bələdiyyədə
koronavirusa qarşı peyvəndlərin sayı hiss olunacaq dərəcədə azalıb
və gündəlik, təxminən, 60-70 adama qədər enib. İyun-avqust dövründə
isə gündə 200-ə yaxın adam peyvənd vurdururdu.
“Gürcü Arzusu”-nun seçkiqabağı kampaniyasının peyvəndlə bağlı
kampaniyadan fərqli nəticələri var. Kənd-kənd gəzmək və bələdiyyədə
yerləşdirilmiş 20 baner nəticəsini verdi, hakim komandanın namizədi
Kənan Ömərov Marneuli bələdiyyəsinin meri oldu. Əhalinin 68,12% ona
etimadını bildirdi.
{{AUDIO}}
Audit Xidmətinin Siyasi Maliyyə Monitorinqi Departamenti 2021-ci
ilin yerli özünüidarə seçkilərində partiyalar tərəfindən xərclənmiş
dəyərin hesabatını yayımlayıb. Sənədə əsasən, Marneuli şəhərində
“Gürcü Arzusu”-nun namizədi Kənan Ömərovun doqquz baneri
yerləşdirilib. Partiya bunun üçün 5 434 lari ödəyib. Real olaraq
bələdiyyədə hakim partiya və onun namizədinin banerləri “Alma” və
“Baza” MMC-nin 15 konstruksiyasında yeləşdirilmişdi. Bu isə
hesabatda təsvir edilməyib. Səbəb odur ki, altı reklamın dəyərini
mer vəzifəsinə namizəd, merin keçmiş müavini və Resurs Mərkəzin
keçmiş rəhbəri Ömərov özü ödəyib. Qalan reklam çarxlarının dəyəri
isə partiya büdcəsindən ödənilib. Kvadrat metrin qiyməti
konstruksiyanın yerinə və şirkətə görə fərqlidir , 30 laridən 42
lariyə qədər dəyişir. Əgər bu göstəriciləri koronavirusa qarşı
peyvənd kampaniyası çərçivəsində yerləşdirilmiş banerlərlə müqayisə
etsək, belə vəziyyət əldə edərik:
Belə çıxır ki, meriya Marneuli bələdiyyəsində peyvəndə çağırış üçün
yeddi dəfə az baner yerləşdirib. Sosial reklam ona heç nəyə başa
gəlib. Bunun büdcəyə əlavə xərc olmadığı halda belə, yerli
özünüidarə əhalinin daha çox məlumatlandırılmasının və peyvənd
prosesinə qoşulmasının qayğısına qalmayıb.
Kənan Ömərovun rəsmi “Facebook” səhifəsində 27 paylaşım edilib.
Paylaşımlarda müxtəlif kəndlərdə seçkiqabağı görüşlər təsvir
olunub. Namizədlə 27 kənddə geniş miqyaslı görüşə kənd əhalisi
toplaşıb. Əksəriyyət maska taxıb, ancaq sosial məsafə heç yerdə
qorunmayıb. Ömərov bələdiyyənin qalan 57 kəndini qapı-qapı prinsipi
ilə gəzib. Seçkiqabağı hakimiyyət partiyasının nümayəndələri
Marneulinin bütün kəndlərinə gediblər. Bələdiyyədəki səyyar peyvənd
məntəqəsi barədə eynisini deyə bilmərik. Belə avtobus musiqi
festivalı “One Caucasusun” rəhbərlərinin təşkilatçılığı ilə
Marneulinin yalnız beş kəndində olub. Nəticədə 197 adam peyvənd
vurdurub. Hakimiyyətin peyvənd kampaniyası çərçivəsində gördüyü
yeganə iş, 20 oktyabr tarixində, müvəqqəti olaraq, 4 günlük, iki
məntəqədə peyvənd məntəqəsinin açılması olub. Tsereteli və Tamarisi
kəndləri onsuz da Marneulidən 10 dəqiqəlik məsafədə yerləşir.
Məsələn, Kirəç-Muğanlı kimi, kəndə getmək üçün bir neçə saat vaxt
lazım olan yerlərdə indiyə qədər peyvənd məntəqəsi açılmayıb və
açılması hələ planlaşdırılmır.
Seçkiqabağı “Gürcü Arzusu” Marneuli televiziyasının ümumi vaxtını
7600 lariyə alıb. Hakim partiya bələdiyyədə 14 qərargahın sahəsinin
icarə haqqına 6 750 lari xərcləyib.
Marneulili mülki fəal Samirə Bayramova bildirir ki, siyasi
subyektlər, xüsusilə də hakim partiya seçkiqabağı dövrdə
koronavirus peyvəndi kampaniyasını tamamilə unudub. Samirənin
fikrinə görə, Marneulidə real nəticə verəcək peyvənd kampaniyasına
hələ başlanılmayıb.
“Yerli özünüidarənin, meriya və eləcə də Bələdiyyə
Məclisinin öz deputatları, merin nümayəndələri vasitəsilə,
kəndlərdə bir çox mövzularda məlumat kampaniyası keçirmək imkanı
var. Ancaq, göründüyü kimi, bu istiqamətdə ümumiyyətlə fəal
deyillər. Biz seçkiqabağı dövrdə (Marneuli bələdiyyəsində deyil)
peyvəndlə bağlı banerin sökülməsinin və əvəzində “Gürcü Arzusu”-nun
namizədinin banerinin asılmasının şahidi olduq. Ümumiyyətlə,
broşürlar da paylanmayıb. Yalnız media hansısa məlumat verə
bilərdi, bu isə kifayət deyil”.
Samirə Bayramova iddia edir ki, yerli özünüidarə üzvləri və
vəzifəlilərin bir qismi heç peyvənd də vurdurmur, nə də
məlumatlandırma kampaniyasının keçirilməsini vacib hesab
etmirlər.
“Demək olar ki, ötən illə müqayisədə, bu il seçkiqabağı
proses də çox fəal deyildi. Ancaq ölkədə epidemiya olmasına və
dövlət məmurlarının əhalini bir yerə toplanmaqdan çəkinməyə
çağırmasına baxmayaraq, biz görürük ki, seçkiqabağı kampaniyaya çox
sayda adam qoşulub, onlar qaydalara əməl etmirdilər. Məsafə, maska
yox idi və ümumiyyətlə, bu risklər barədə düşünmürdülər. Onlara
əsas o idi ki, görüşdə çox adam olsun. Əhali partiyanın seçkiqabağı
görüşlərinə “Gürcü Arzusu” və yüksək vəzifəlilərin tələbi ilə
gedib. Əksər hallarda isə əhali dövlətdən, peyvəndin vurulması
barədə tələb gözləyir. Seçkilər bizə göstərdi ki, dövlət və hakim
partiya əhalinin yanına gedə və onlara məlumat verə bilər. Ancaq,
eyni zamanda görürük ki, partiya bunu etmir.”
Mülki İştirak və Aktivizm Mərkəzinin rəhbəri Rəşan Ziyadəliyev
Samirə Bayramovanın fikri ilə razılaşır. O, düşünür ki, Marneulidə,
peyvənd kampaniyasının keçirlməsinə bələdiyyə kifayət qədər resurs
sərf etmir. O, qeyd edir ki, “Gürcü Arzusu”-nun seçkiqabağı
görüşlərində Marneulidən onlarla və yüzlərlə adam iştirak edirdi.
Ancaq, orada peyvəndin vacibliyindən danışmırdılar”.
“Geniş miqyaslı görüşlərin keçirilməsi faktı,
Marneulidə epidemioloji proseslərə böyük təsir göstərir. Çünki biz
bilirik ki, Marneulidə koronaviursa qarşı peyvəndlə əlaqədar çox
sayda yanlış məlumatlar yayımlanıb. Bu vəziyyətdə müxtəlif
partiyalar, əsasən də “Gürcü Arzusu” onlarla adamın iştirak etdiyi
əhali ilə görüşlərə gedir. Görüşlərdə nə məsafə saxlanılır nə də
maska taxılır. Bu, əlbəttə, əhalinin ümumi əhvalına və virusun
yayımlanmasına böyük təsir göstərir. Biz Marneuli şəhərində və
kəndlərdə “Gürcü Arzusu”-nun banerlərini görürdük. Ancaq, peyvəndlə
əlaqədar biz artıq aylardır yalnız bir neçə baner
görürük.”
Ziyadəliyev bildirir ki, mərkəzi hakimiyyət və yerli özünüidarə
əhaliyə, xüsusilə də qeyri-gürcü dilli vətəndaşlara peyvənd barədə
ətraflı məlumat çatdırmağa çalışmalıdır.
“Məsələn, “Gürcü Arzusu”-nun Sadaxlıda 200-ə yaxın adamla görüşü
keçirildi. Görüş bir saat yarım davam etdi. Bu vaxt ərzində peyvənd
barədə danışmağa maksimum bir dəqiqə vaxt ayırardılar. “Gürcü
Arzusu” bu görüşlərdə əhalinin sağlamlığı barədə deyil, yalnız və
yalnız qələbə barədə düşünürdü.”
Yerli özünüidarə və mərkəzi hakimiyyət koronavirus pandemiyasını
seçkilərdən sonra xatırladılar. 20 oktyabr tarixində, Marneuli
bələdiyyəsində iki əlavə məntəqə açıldı. Onlardan birində,
Tsereteli kəndində Marneuli meri səlahiyyətlərini icra edən Zaur
Tabatadze “Sinofarmın” birinci dozası ilə peyvənd olundu. Tamarisi
və Tseretelinin peyvənd kabinetlərində ümumilikdə, 38 adam peyvənd
vurdurub. 2014-cü ilin siyahısına görə, hər iki yerdə 3590 vətəndaş
yaşayır.
“Dövlət Audit Xidmətinin göstəricilərinə görə, “Gürcü Arzusu”
seçkiqabağı banerlərə, plakat və Marneulidə seçkiqabağı kampaniyaya
20 000 laridən artıq pul xərcləyib. Qalib mer 27 oktyabr tarixindən
səlahiyyətlərinin icrasına başlayacaq. Beşinci dalğa fonunda o, çox
sayda yerli problemlə yanaşı, pandemiya ilə də mübarizə aparmalı
olacaq. Yeni merin peyvənd prosesini daha da fəal etmək üçün hansı
planlarının olması bizə məlum deyil. Çünki Ömərov “Marneuli”
radiosunun zənglərinə cavab vermir. Indiki mərhələdə, mer
səlahiyyətlərini icra edən şəxsin və yerli İctimai Səhiyyə
Mərkəzinin rəhbərinin məlumatına görə yaxın gələcəkdə, Sadaxlı
kəndində də bir neçə günlük peyvənd məntəqəsi açılacaq.
Stopgov.ge-nin 18 oktyabr tarixinə olan göstəricilərinə görə,
Gürcüstanda koronavirusdan 9565 nəfər peyvənd olunmamış, 23 nəfər
peyvənd olunmuş adam dünyasını dəyişib.