“Qirçi – daha çox azadlıq” təşkilatının lideri Zurab Caparidzenin
sözlərinə görə, o, DTX-nin girişlərini bağladığına görə 200 lari
cərimələnib. Bunu jurnalistlərə Caparidze deyib.
Daxili İşlər Nazirliyindən verilən məlumata görə, noyabrın 12-də
İnzibati Xətalar Məcəlləsinin asayiş keşikçisinin tələbinə tabe
olmamağı nəzərdə tutan 173-cü maddəsi ilə ümumilikdə 10 nəfər
saxlanılıb. Caparidzeyə gəlincə, Daxili İşlər Nazirliyindən
Netqazeti-yə bildiriblər ki, onun cərimələnməsi ilə bağlı məsələ
dəqiqləşdirilir.
Eyni zamanda, Caparidzenin sözlərinə görə, deputat mandatı olduğu
üçün onu həbs etməyiblər:
“Yolu bağladığım üçün məni 200 lari cərimə etdilər.
Bundan əlavə, 173-cü maddə ilə itaətsizliklə bağlı cinayət işi
açılır, amma onların heç bir əmrini eşitmədiyim üçün nəyə tabe
olmadığımı bilmirəm, maşında oturmuşdum. Üstəlik, avtomobil cərimə
meydançasına aparılıb və yəqin ki, oradan çıxarmaq üçün də xərclər
lazım olacaq.
Məni həbs etmək mümkün olmadı, çünki iki dəfə millət vəkilliyindən
imtina etməyimə baxmayaraq, bu məsələ səsverməyə çıxarılmayıb və
hələ də deputatam. Mənim dostlarım da Gürcüstanın 5 şəhərində
saxlanılıb", - deyə Caparidze izah edib.
O, dayanacağa aparıldıqdan sonra avtomobildən könüllü olaraq özünün
düşdüyünü bildirib.
Bu gün, noyabrın 12-də, saat 12-də Gürcüstanın 6 şəhərində
“Qırçı-daha çox azadlığ”ın siyasətçiləri DTX binasının girişlərini
maşınlarla bağlayıblar. Badri Qriqalaşvili Qoridə, Tbilisidə Zura
Caparidze, Batumidə Temur Qorqadze, Kutaisidə İmeda Kldiaşvili,
Rustavidə İrakli Kukaniya və Telavidə Torres Moss DTX binasının
girişini bağlayıb.
Onların avtomobillərinin şüşələrində “2 faizlik baryerlə tam
proporsional seçki sistemi”, “yazda erkən seçkilər”, həmçinin “şərh
vermirəm, mətbuat xidməti ilə əlaqə saxlayın” sözləri yazılmış
plakatlar olub. Partiyanın nümayəndələri həmçinin Gürcüstanın
keçmiş prezidenti Mixeil Saakaşvilinin mülki klinikaya
köçürülməsini tələb ediblər.
“Qirçi – daha çox azadlıq” partiyasının lideri Zurab Caparidzenin
fikrincə, sistem fərdi etirazlarla məğlub olacaq. Caparidze bu
barədə “Qirçi TV”yə açıqlamasında deyib:
“Bu sistemi son nəticədə insanların fərdi etirazı
məğlub edəcək. Mən inanıram ki, mən və hər kəs nəsə edə bilər. Əgər
həqiqətən istəsən, milyonlarla şey düşünülə və edilə bilər. Mən
bura gələndə mənə aydın idi ki, biz burada qalmayacağıq, amma
hansısa fədakarlığa hazırlaşmalıydıq, o cümlədən bir müddət
azadlığınızı itirə bilərsiniz, avtomobiliniz zədələnə bilər,
cərimələnə bilərsən və s. Düşünürəm ki, buna gedə biləcək insanlar
var”.