Ötən gecə Rusiyanın Belqorod şəhərində neft bazasında yanğın baş
verib, yaxınlıqdakı küçələrin sakinləri müvəqqəti olaraq evlərindən
təxliyə edilib.
Belqorod vilayətinin qubernatoru Vyaçeslav Qladkov deyir ki, neft
anbarı iki Ukrayna helikopteri tərəfindən bombalanıb. Ukraynanın
özü bu məlumatı hələ ki, təsdiqləməyib. Belqorod Rusiya-Ukrayna
sərhədindən 30 kilometr aralıda yerləşir və Rusiyanın Ukraynanın
Xarkov şəhərinə ən yaxın şəhəridir. Müharibə başlayandan bəri rus
ordusu Xarkovu davamlı olaraq bombalayır.
Rusiya hakimiyyətinin məlumatına görə, neft bazasında iki nəfər
yüngül xəsarət alıb, itki yoxdur, yanğınsöndürənlər hadisə yerində
işləyirlər.
Bundan bir neçə gün əvvəl də Belqoroddakı silah anbarında yanğın
baş vermişdi. Daha sonra Rusiya hökuməti bunun “insan faktoru” ilə
bağlı olduğunu bildirib.
Rusiya fevralın 24-də Ukraynanı işğal etdi. Müharibə artıq
Ukraynada minlərlə insanın, o cümlədən ən azı 150 uşaqın ölümünə
səbəb olub. 10 milyon insan evlərini tərk etmək məcburiyyətində
qalıb, onlardan 4 milyonu Aİ ölkələrinə köçüb.