ABŞ Dövlət Departamentinin sözçüsü Ned Price bildirib ki, Birləşmiş
Ştatlar hökuməti “Rusiya və ya onun marionetlərinin Gürcüstanın
suveren ərazisini bölmək cəhdini” tanımır.
Martın 31-də Dövlət Departamentinin brifinqində jurnalist Davit
Nikuradzenin bu ərazinin Rusiyaya birləşdirilməsinə dair faktiki
hökumət tərəfindən təşkil olunmuş referendumla bağlı Dövlət
Departamentinin mövqeyinin necə olduğu sualına Prays bildirib ki,
ABŞ Abxaziya və Cənubi Osetiyanın Rusiya tərəfindən işğalını
pisləyir.
Onun sözlərinə görə, Birləşmiş Ştatlar Rusiyanı işğala son qoymağa
və “2008-ci il atəşkəs sazişindən irəli gələn öhdəlikləri yerinə
yetirməyə”, xüsusən də qoşunları 2008-ci ildə münaqişədən əvvəlki
mövqelərə çıxarmağa çağırır.
“Nə qondarma hökumətin, nə də Rusiya hökumətinin Cənubi
Osetiyanın gələcəyi ilə bağlı qərar qəbul etmək hüququ yoxdur. Bu,
Gürcüstanın ayrılmaz hissəsidir. Biz Rusiyanın və ya onun
marionetlərinin Gürcüstanın suveren ərazisini bölmək cəhdlərinin
nəticəsini tanımırıq”.
İşğal olunmuş Cənubi Osetiyanın qondarma prezidenti Anatoli Bibilov
yaxın vaxtlarda Cənubi Osetiyanın Rusiya Federasiyasına daxil
olması üçün hüquqi tədbirlər görəcəyini bildirib. Onun sözlərinə
görə, artıq Rusiya Federasiyası ilə məsləhətləşmələr aparılır.
Gürcüstanın xarici işlər naziri Davit Zalkaliani bəyan edir ki,
Gürcüstan ərazisinin işğalı fonunda hər hansı referendumdan
danışılması yolverilməzdir.
Kremlin sözçüsü Dmitri Peskov Moskvanın Cənubi Osetiyanın Rusiya
Federasiyasına daxil olmasına icazə vermək üçün heç bir hüquqi və
ya digər tədbir görmədiyini, lakin Cənubi Osetiya xalqının seçiminə
hörmət etdiyini bildirib.
“Mən [qoşulma və referendumla bağlı] heç bir mövqe bildirə
bilmərəm. Biz bununla bağlı heç bir hüquqi və ya başqa addım
atmayacağıq, lakin eyni zamanda, bu halda söhbət Cənubi Osetiya
xalqının fikrini ifadə etməkdən gedir və buna hörmətlə
yanaşırıq”, – Peskov jurnalistlərə deyib.