Gürcüstanın Ukraynadakı səfiri yaxın gələcəkdə ölkəsinə qayıdacaq.
Bunu Gürcüstanın xarici işlər naziri İliya Darçiaşvili deyib.
Nazir qeyd edib ki, rəsmi Tbilisi ənənəvi mövqeyini saxlayaraq
Ukraynanın davranışlarına təmkinlə yanaşacaq və bu məsələnin
müzakirəsini gələcəkdə aparılacaq ikitərəfli müzakirələrə
saxlayacaq.
XİN başçısı ölkəsinin Ukraynanı əvvəlki kimi dəstəkləməyə davam
edəcəyini qeyd edib. Nazir əlavə edib ki, Gürcüstan Ukraynaya
aktiv
şəkildə humanitar, siyasi, diplomatik yardım edib və bu, Tbilisinin
öz tərəfdaşına qarşı məsuliyyətidir.
“Heç bir məsuliyyətsiz davranış və ya qərar bizi bu
xəttən yayındıra bilməz”, - Darçiaşvili deyib.
XİN başçısı Ukraynanın Mixeil Saakaşvili ilə əlaqədar qəbul etdiyi
qərarının əsassız olduğunu vurğulayıb.
“Ukraynadan eşitdiyimiz bu qərar anlaşılmaz və
əsassızdır. Dostlar bu cür münasibətə layiq deyillər. Biz ənənəvi
olaraq bu vaxtadək bəzi ukraynalı siyasətçilərdən Gürcüstana qarşı
bir çox anlaşılmaz, ədalətsiz münasibət görmüşük. Həmişəki kimi biz
təmkinli qalırıq. Bu məsələlərin gələcəkdə ikitərəfli formatlarda
müzakirəsi üçün vaxtımız olacaq, lakin indi, daha əvvəl ifadə
etdiyimiz mövqeyi seçirik. Biz buna reaksiya
verməyəcəyik”, - Darçiaşvili deyib.