Təhsil sistemində aparılan islahatlar nəticəsində İlia Dövlət Universitetində etnik azlıqlar

üçün nəzərdə tutulmuş gürcü dilində hazırlıq ("1+4") proqramı tələbələrinin bakalavr ixtisası seçimi kəskin şəkildə məhdudlaşdırılıb.

Məzunlar 2026-2027-ci tədris ilindən etibarən sözügedən universitetdə 31 təhsil proqramı əvəzinə yalnız 14 istiqamət üzrə təhsillərini davam etdirə biləcəklər.

"Gürcü dili ikinci dil kimi və inteqrasiya proqramı" illərdir ki, etnik azlıqları təmsil edən gənclər üçün mühüm körpü rolunu oynayır. 2025-2026-cı tədris ilinin sonu üçün İlia Dövlət Universitetinin sözügedən proqramından 225 nəfər məzun olur, lakin onların əksəriyyətinin istədikləri fakültədə təhsil almaq imkanı əlindən alınıb.

Ötən illərdə hazırlıq kursunu bitirdikdən sonra tələbələr 31 bakalavr proqramı arasında seçim edə bilirdilər. Bunların arasında hüquq, psixologiya, beynəlxalq münasibətlər, siyasi elmlər, sosiologiya, maliyyə, menecment, turizm, memarlıq, incəsənətşünaslıq, ekologiya və digər bu kimi yüksək tələbat olan istiqamətlər var idi.

Yeni islahat çərçivəsində, fakültələrin yenidən bölgüsü və optimallaşdırılması nəticəsində universitetdə "1+4" proqramının məzunları üçün yalnız 14 proqram qalıb (onların da əksəriyyəti inteqrasiya olunmuş birillik müəllim hazırlığı modulu ilə birgədir):

• İngilis dili və ədəbiyyatı
• Tətbiqi alman dili və ədəbiyyatı
• Fransız dili və ədəbiyyatı
• Tarix
• Rus dili və ədəbiyyatı
• Gürcü filologiyası
• Sərbəst elmlər
• Yer elmləri
• Fizika
• Biologiya
• Riyaziyyat
• Kompüter mühəndisliyi
• Mülki mühəndislik
• Erkən uşaqlıq dövrü, inkişaf və təhsil

İlia Dövlət Universitetinin Elmlər və İncəsənət fakültəsinin ingilis dili və ədəbiyyatı istiqaməti üzrə assosiasiya olunmuş professoru Nino Mataradzenin sözlərinə görə, bu qərar 1 illik hazırlıq kursunun yalnız dil tədrisini nəzərdə tutmadığı nəzərə alınarsa, xüsusilə ağrılıdır. Bu, tələbələrin universitet məkanına və şəhərə tam inteqrasiyası prosesi idi.

"Tələbələrin artıq İlia Dövlət Universitetinin ötən illərdə elan etdiyi bütün proqramları, o cümlədən İliauniyə qəbul olarkən təhsillərini davam etdirə biləcəklərini düşündükləri proqramları seçmək imkanı yoxdur. Yəni onlar İliada istədikləri bakalavr proqramı üzrə təhsil alacaqları ümidi ilə daxil olmuşdular, lakin tədris prosesində məlum oldu ki, proqram seçimləri kəskin şəkildə məhdudlaşdırılıb."

"1+4" proqramının tələbəsi Bayram Məmmədov sosial şəbəkədə yayımladığı bəyanatda bu qərarın gənclərin rəyi nəzərə alınmadan verildiyini bildirir:

"Biz, „1+4“ hazırlıq proqramının tələbələri, İlia Universitetini vaxtından əvvəl tərk etməyə məcbur olduq. Bu, bizim seçimimiz deyildi. Hüquqlarımızı qorumaq üçün bir çox addımlar atdıq — aksiyalar keçirdik, ərizələr yazdıq, lakin qərar bizim iştirakımız və razılığımız olmadan qəbul edildi. Təhsil sistemində aparılan islahat yüzlərlə tələbənin gələcəyini və planlarını alt-üst etdi."

Məmmədovun sözlərinə görə, bu bəyanat yalnız bir nəfərin değil, öz seçdikləri universitetdə təhsillərini başa vurmaq istəyən bütün hazırlıq proqramı tələbələrinin ümumi mövqeyini ifadə edir.

İstədikləri ixtisaslar İlia Dövlət Universitetində ləğv edilən və ya başqa ali təhsil müəssisələrinə keçirilən tələbələr indi təhsillərini digər universitetlərdə davam etdirməli olacaqlar. Bu isə onların yenidən uyğunlaşmasını, yaşayış şəraitini dəyişməsini və inteqrasiyanın ilk, ən çətin mərhələsini keçdikləri mühiti tərk etməsini tələb edir.

 

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.