Müəllim üçün məktəbdən kənar başlayan tədris ili
17:02 / 18.09.2019
Maya
Məmmədova səhər tezdən evdən çıxır, məktəbin həyətinə gedir və
həmin məqamda da gözü yaşlı geri evə qayıdır.
Sonra məktəb ləvazimatlarına baxır və fikrində
dərsi yüz dəfə düşünür.
45 ildən sonra o, bu il ilk dəfə sinfə daxil olmayıb.
68 yaşlı tarixçi məktəbi tərk etməklə bağlı qərarı çox çətin
verib.
“Dünən bir müəllim gördüm, məktəbə gedirdi, həmin an
evin qapısını örtdüm və ağlamağa başladım. Bütün gün nə edim,
həyətdə ora-bura gəzirəm. Əlimə kitablarımı alıram və keçdiyim
dərsləri xatırlayıram, hansı şagird mənə nə demişdi. Neçə dəfə
məktəbi düşünərək yeməyi yandırmışam”, - Maya Məmmədova deyir.
İlk dərsi 23 yaşında, Marneulinin 1 saylı orta məktəbində keçib.
Ondan sonra məktəbi tərk etməyi heç düşünməyib. Məktəbdən
təşəkkürnaməsini və həyatında ən dəyərli olanı gətirib:
“Uşaqların sevgisini gətirdim, uşaqlar mənim ürəyimdədir.
Bir də öz kitablarımı gətirdim. Bəzilərinə uşaqların ad soyadı
yazılıb, bununla onları xatırlayıram”, - 68 yaşlı müəllim
deyir.
Maya Məmmədova təəssüflənir ki, uşaqlara Gürcüstanın bütün tarixi
abidələrini göstərə bilməyib. Deyir ki, yeniyetmələr başqa
ölkələrin mədəniyyəti ilə maraqlanırlar, özlərininkini isə
tanımırlar. Dövlət dilini də bilmirlər ki, bu da çox şeydə onlara
mane olur.
“Son dövrlərdə, hökumətin uşaqlara dövlət dili öyrənmək
imkanı verdiyi zaman özümü dəyərli hiss etdim. Uşaqlara baxanda
görürdüm ki, gürcü dilini bilmirlər. Nə dili başa düşürlər, nə də
hərfləri dəqiq bilirlər. Mən də bacardığımı öyrədirdim və bu məni
sevindirirdi”, - Maya Məmmədova bildirir.
Tarix müəlliminə Təhsil Nazirliyi məktəbi tərk etməsi qarşılığında
mükafat olaraq 2 illik maaşını və daimi sığorta təklif edib. Çətin
olsa da, o qeyd etdi ki, məktəbdə nəsillər mütləq dəyişməlidir.
“Düşünürəm ki, gənclər də çalışmalıdır. Bu da tarixdir,
kimsə kimisə əvəz edir, düşündüm ki, yaxşı olar gedim, yolu
gənclərə verim. Stresdəyəm, amma bilirsiniz, hər bir xəstəliyin
dərmanı zamandır”, - 45 illik müəllim Maya gözləri dolmuş halda
deyir.
Maya müəllimdən başqa nazirliyin təklifini Marneulidə daha 260
pensiya yaşlı müəllim qəbul edib. Təhsil Resurs Mərkəzində
Marneulidə fəaliyyət göstərən 3000 müəllimdən neçə nəfərinin 60
yaşdan yuxarı olduğu barədə məlumat yoxdur.