Bildiyimiz kimi, uzun zamandır davam edən koronavirus həyata,
yaşama və bir çox şeyə təsir etdiyi kimi, insan sağlamlığına və
psixologiyasına da mənfi təsir göstərir.
Demək olar ki, hər gün, hər kəs koronavirus xəbərləri haqda məlumat
alır və paylaşım edirlər.
Bəs oxuduğumuz bütün xəbərlər doğrudurmu?
Biz düzgün məlumatları haradan və necə əldə etməliyik?
Bu günə kimi koronavirus qorxusu ilə internet səhifələrində
müxtəlif yazılar və yalan xəbərlər yayıblar və yaymağa davam
edirlər. Misal üçün Gürcüstanda virusun yayıldığı ilk zamanlar belə
bir məlumat paylaşılmışdı ki, göydən virus üçün dezinfeksiya
məhlulu səpiləcək, buna görə də insanlar gecə saatlarında çölə
çıxmamalıdır. Artıq bu cür yanlış məlumatlar günü-gündən çoxalmağa
başlayıb.
Təxminən 1 həftədən çoxdur ki, yeni bir yalan məlumat yayılaraq
insanları təşvişə salıb. Sözü gedən mesaj formalı hər kəsə
göndərilən bu yazıda deyilir ki, həkimlər polislərlə birlikdə
qapı-qapı, ev-ev gəzərək insanlara peyvənd vuracaqlar ki, bu
peyvənd də virus tərkibli olub, 6 ay ərzində insanları öldürəcək.
Bəzi yerlərdə bu məlumatlara inanan insanlar həyət evlərinin
qapısını kilidləyərək çağıranların qarşısına çıxmırlar.
Bunlardan fərqli olaraq bəzi insanlar isə bu cür məlumatlara
inanmır və qarşısının alınmasını tələb edirlər. İnsanları narahat
edən yanlış məlumatları nəzərə alaraq Marneulinin Meri Zaur
Darğallı ilə əlaqə saxladıq.
O, deyir ki, heç bir əsası olmadığı halda bu məlumatı yayanların
qarşısı alınacaq və cəzasız qoyulmayacaqdır. O, təəssüflə bildirdi
ki, artıq bu hal bir neçə dəfə baş verib. Bu çətin zamanda
insanları təşvişə salır və yalan məlumatlar verirlər.
"Marneuli əhalisindən xahiş edirəm ki, bu cür yalan
məlumatlara və qeyri-rəsmi mənbələrdən oxuduqları xəbərlərə
inanmasınlar. Yalnız rəsmi və obyektiv mənbələrdən xəbərlər
alsınlar", – Marneuli meri dedi.
Sözü gedən yazılı məlumatı sizə təqdim edirik.