Kürtlər kəndində yaşayan 69 yaşlı Sarey Xanzadayeva 46 gündür ki,
yaşadığı evdən çölə çıxmır.
O, hökumət tərəfindən qoyulan karantin qaydalarına ciddi şəkildə
riayət edərək, evdə qalır. İlk günlər karantində qalmaq onun üçün
çətin olsa da, daha sonra həmin qaydalara öyrəşib.
Sarey Xanzadayeva 21 ildir ki, tək yaşayır. O, deyir ki, həyat
yoldaşı Borçalı elinin sayılan ziyalılarından biri olub. 1999-cu
ildə həyat yoldaşı dünyasını dəyişib. İndi o, tək yaşayır.
Övladları yanında olmadığına görə, evdə tək başına karantin vaxtını
keçirmək onun üçün çox çətindir.
Müsahibmiz deyir ki, karantində qalmaq onun üçün çətin olsa da,
hökumətin qoyduğu qaydalara riayət etmək onun üçün çox vacibdir. O,
ümid edir ki, bu bəla tezliklə bitəcək.
“69 yaşım var. İndiyə qədər belə bir hadisə nə eşitmişəm, nə də
görmüşəm. Fikirimcə, bu çox ciddi vəziyyətdir. Əgər ciddi
olmasaydı, hökumət bu qədər əl-ayağa düşməzdi. Bəzi insanlar bu
virusun olduğuna şübhə ilə yanaşır. Amma mən belə fikirləşmirəm və
qoyulan bütün qayda-qanunlara ciddi sürətdə əməl edirəm. Bütün
həmyaşıdlarıma səslənirəm. Özümüzün və gələcək nəslimizin
sağlamlığı üçün hər bir kəs qoyulan qadağalara əməl etməlidir.
Beləliklə uşaqlarımız, nəvə-nəticələrimiz üçün daha möhkəm, sağlam
gələcək qurmuş olarıq”, – Sarey Xanzadayeva
deyir.
Sarey Xanzadayeva əvvəllər əkinçilik və maldarlıqla məşğul olub.
Yaşa dolduqca işləmək onun üçün çətinləşib. Buna görə də fiziki
işlərdən uzaq durub. İndi o, dövlət tərəfindən verilən 220 lari
təqaüdlə dolanır.
Evdən çölə çıxmaq qadağası qüvvəyə mindikdən sonra Sarey
Xanzadayeva bütün gününü ev işləri, həyətində əkib becərdiyi gül və
ağaclara qulluq etməklə keçirir. Gündəmdən xəbər tutmaq üçün
televizorda xəbərləri izləyir və maarifləndirici verilişlərə
baxır.
“Demək olar ki, bütün günü evdə tək oluram. Evdə özümə yemək
hazırlayıram, evi-eşiyi yığıb təmizləyirəm. Qapını-bacanı
təmizləyirəm. Son vaxtlar tez-tez xəbərləri baxıram, xəstəliyə görə
bu dünyanın axırı necə olacaq. Digər vaxtlarda da seriallara
baxıram. Başqa nə var ki, baxım? Ən çox türk seriallarına baxıram.
Əsasən türk və Azərbaycan televiziya kanallarını izləyirəm. Gürcü
kanallarına baxa bilmirəm. Ona görə ki, gürcü dilini bilmirəm, necə
baxım? Elə ölkədə nə baş verir onu Azərbaycan kanallarından və
ondan-bundan eşidirəm. Gürcüstanda siyasətçilərdən bircə Sakoyu
(Saakaşvili) tanıyıram, başqa heç kimi tanımıram. Son dəfə mən
Marneuliyə 19 martda getmişəm. Ondan bəri getməmişəm. Bir ay bundan
qabaq bir dəfə selsovet tərəfindən yardım almışam. Başqa yardım
almamışam. Həyatda bircə yaşamağı xoşlayıram”, –
Sarey Xanzadayev deyir.
69 yaşlı müsahibimiz deyir ki, övladları onu tək qoymur tez-tez
zəng edərək hal-əhvalı ilə maraqlanırlar. Lazım olan hallarda onun
övladları dərmanlarını, yeyəcək məhsullarını almaqda ona kömək
edirlər.
“Karantini tək keçirmək mənim üçün o qədər də çətin
olmadı. Mənim 4 övladım var. Onlaradan biri Rusiyada, biri
Ukraynada digər, ikisi isə Gürcüstanda yaşayır. Onlar həmişə mənə
maddi və mənəvi dəstək olurlar. Bu gün də ehtiyacım olan hər şeylə
məni təmin edirlər. Ondan başqa karantin rejimi qoyulduqdan sonra
dövlət tərəfindən bir dəfə yardım almışam. Son vaxtlarda əhali
arasında bəzi şaiyələrin yayılması məni çox narahat edir. İnsanlar
təlaşa düşür. Mənə elə gəlir ki, təlaşa düşməyə heç bir səbəb
yoxdur. Hər şey yaxşı olacaq və mən birlikdə buna qalib
gələcəyimizə səmimi qəlbdən inanıram. Hamıya dözüm və səbir
arzulayıram”, – Sarey Xanzadayeva deyir.
Sarey Xanzadayeva deyir ki, nəvələri, nəticələri üçün çox darıxıb.
Koronavirusun tez bir zamanda qurtarmasını arzulayır. O, ümid edir
ki, tez bir zamanda bu bəla yox olub gedəcək.
Müəllif: Nihad Məmmədov