Marneulidəki gözəllik salonlarının bir qismi bu gün müştəri qəbul edə bilməyib
17:13 / 18.05.2020
Bu gündən etibarən gözəllik salonları və estetik mərkəzlər açılıb.
“Marneuli” radiosu bələdiyyədə yerləşən iyirmiyə yaxın salonda
oldu.
Binaların bir qismində qıfıl dururdu. Əksəriyyəti isə açıq, ancaq
müştərilər üçün “bağlı” idi. Stilistlər indi otaqların qaydaya
salmaqla və təmizlik işləri ilə məşğul idilər. Marneulidə yerləşən
“Lili” salonunun rəhbərliyi iki ay gəlirsiz qalmalarından
gileylənir. Hansı tövsiyələri nəzərə alacaqlarını da dəqiq
bilmirlər. Dezinfeksiya vasitələri və termoskrininq aparatını artıq
alıblar.
“Hər dəqiqə yeni nələrsə (tənzimləmələr) çıxır, biz də
tanış oluruq və çalışırıq qaydaları pozmayaq. Bu gün salonu açdıq
və maraqlanırıq nə necə olacaq”, – salonun rəhbəri Leyla Arslan
deyir.
“Deyirlər dövlət birdəfəlik kompensasiya verəcək. Həmin pulun mənə
nə xeyri var? Yenə salona xərcləyəcəm. Həmin pulla ailəmə çörək
alası deyiləm ki? Yenə salon üçün xalatlar, maskalar, əlcək və daha
nələr alacam. Salon necə işləməlidir? Mən bilmirəm, təsəvvürüm də
yoxdur. İcarə pulu ödəyirəm, bir yandan yemək almalıyam, heç
bilmirəm nə olacaq?” – manikür ustası Alvina Arutyunova
deyir.
Digər salon nümayəndələri də həmin problemlərlə qarşı-qarşıyadır.
Bizimlə söhbəti zamanı əksəriyyət bildirir ki, hələ qeyri-müəyyən
vəziyyətdədirlər və yeniliklərlə mərhələli şəkildə tanış olurlar.
İki ay faktiki olaraq boş olduqlarına görə vəziyyətdən asan çıxa
bilməyəcəklərindən qorxurlar.
Slaonlar Səhiyyə Nazirliyinin verdiyi tövsiyələri nəzərə
almalıdırlar. Onlara termometrlərdən, qoruyucu şüşələrdən,
dezinfeksiya məhlulundan, maska və əlcəkdən istifadə də daxildir.
İş məkanında müştəri sayına nəzarət olunmalıdır – 5 kv. m. sahədə
bir müştəri və bir usta olmalıdır. Hər iş masası arasında 2 metrlik
məsafə qoyulmalıdır. 2 merlik məsafəyə riayət etmək mümkün olmazsa,
məkanların təcridi üçün yuyulması və təmizlənməsi mümkün olan
(hərəkətli divarlar) arakəsmələrdən istifadə olunmalıdır. Salona
əvvəlcədən yazılmaq da vacib şərtdir.