44 yaşlı Axlı-Lələ kənd sakini Ramil Quliyev 9 ilə yaxındır ki, 1
hektarlıq əkin sahəsində ilin 11 ayını işləyir və 2000 metrlik əkin
sahəsində çiyələk əkir.
Quliyev asan işin olmadığını və hər iş kimi çiyələk əkməyin də
çətin olduğunu deyir. Onun sözlərinə görə, bir fəsil ərzində
təxminən 7-9 ton çiyələk toplayır.
“Çətindir, asan heç nə yoxdur, çətindir. 11 ay
işləyirik 30 gün yığırıq-satırıq. Birdən qiymətə getmir xərci
həddinən artıq çox olur”, – fermer Ramil Quliyev
dedi.
Quliyev deyir ki, koronavirusun Marneuli və Bolnisi
bələdiyyələrində təsdiq olunması onun məhsul yığımını həyata
keçirməsinə mane olub. Fermer deyir ki, məhsulu yığmaq üçün hər il
işçiləri Bolnisidən gətirirmiş. Lakin Bolnisi bələdiyyəsində
koronavirusun təsdiq olunmasından, bələdiyyəyə giriş-çıxışa qadağa
qoyulmasından sonra o, məhsul yığımını həyata keçirmək üçün işçi
qüvvəsini bir araya toplaya bilməyib.
Quliyev işçilərinin gələ bilmədiyinə və suvarma suyu ilə bağlı
problemlər yaşadıqlarına görə məhsulun toplama işlərininin
gecikdiyini bildirdi.
“Bu günkü gündə də işçilər gələ bilmədilər. Bu da ötüb
gedir, yığanımız yoxdur. Vaxtında kətənləyə, suvara bilmədik.
Suyumuz biraz çətin olur. Ona görə gec
yetişdi”.
Bu gün çiyələyi 1,80 – 2 lariyə satan fermer deyir ki, işlərini
vaxtında həyata keçirə bilsə indi məhsulunu 2 deyil 4 lariyə sata
bilərdi.
“Vaxtında sulanıb, vaxtında kətənlənsəydi, vaxtında biz
də 4 lariyə sata bilərdik. Siftə edə bilərdik”, –
R.Quliyev deyir.
O, xarab məhsulun satılmamasına xüsusi ilə diqqət etdiyini və
məhsul satışı zamanı alıcılara xarab məhsul satmadığını
bildirdi.