Marneulidə ictimai nəqliyyatın hərəkəti bərpa olunub. Əsas
tələblərdən biri maska taxmaqdır, ancaq Marneulidə ilk gündən bu
baxımdan problem yaranıb.
Maskası olmayan bir neçə şəxsə sürücü maska paylayıb. Maşından enən
zaman isə qaytarmalarını tələb edib. Güman ki, sürücü həmin
maskaları başqa sərnişinlər üçün də istifadə edəcəkdi.
“Beş saylı məktəbin qarşısındakı dayanacaqda marşruta
mindim. Sürücü iki sərnişindən xahiş etdi ki, maskanı geri
qaytarsınlar, onlar da qaytardı. Sürücüdən bunu niyə etdiyini
soruşdum və cavab verdi ki, müştəriləri itirməmək üçün onlara maska
verməli olub”, – adının hallanmasını istəməyən şəxs
“Marneuli” radiosuna bildirib.
Biz 1 və 2 nömrəli marşrut şirkətinin – “Ekspress Turist”-in
direktoru Yuri Samxaradze ilə əlaqə saxladıq. O, faktı təsdiq etdi
və dedi ki, sürücülərə artıq xəbərdarlıq edilib.
“Bu problem artıq həll olunub. Sürücülər məni yordular.
Onlarla danışdıq və sabahdan düşünürəm hər şey qaydasında
olacaq”, – Yuri Samxaradze deyir.
Marneulidə ictimai nəqliyyatın hərəkəti 29 may tarixindən bərpa
olunub. Sərnişinlərin maska taxması məcburidir. Onların ayaq üstə
durması qadağandır.