Bir neçə aydır ki, Saimerlonun daxili yollarında bələdiyyə
nəqliyyatı qarışıq qrafiklə hərəkət edir.
İndiyə kimi əhali təxmini də olsa nəqliyyatın nə zaman gələcəyini
bilirdisə, indi vəziyyət dəyişib. Nəqliyyatın Marneuliyə nə vaxta
gedib çatacağı sürücülərin "xoş niyyətinə" bağlıdır. Kənddə üç
yerdə – Zaza Bocoidze, Barataşvili və Şamatava küçələrində bu
problem var. Əhalinin dediyinə görə, kənddə genişmiqyaslı
kanalizasiya layihəsinə başlanıldıqdan və nəticədə asfalt qatının
xarab olmasından sonra nəqliyyatın qrafiki qarışıb.
"Əhali artıq həqiqətən də narahatdır. Nəqliyyat normal
işləmir. Yol xarabdır deyə buradan keçməyə ərinirlər. Yolu biz
xarab etməmişik. Şirkət xarab edib, işi də sona
çatdırsın."
"Bu istidə saatlarla küçədə dayanmışam və nəqliyyat
gəlməyib. Neçə dəfə belə hal baş verib. Bir dəfə maraqlandım ki,
görəsən nı baş verir və sonuncu dayanacağa getdim. Marşrutkalar
oradan geri qayıdırmış"- kimliklərinin bilinməsini
istəməyən Saimerlo sakinləri dedilər.
Nəqliyyatın belə qrafiklə işləməsini Marneulinin ictimai nəqliyyat
şirkətlərinin direktorları da təsdiq edir. Onlar bildirdilər ki,
“marşrutka”lar xarab yolla hərəkət edəndə yararsız vəziyyətə düşür.
Problem barədə isə yerli özünüidarəyə məlumat veriblər.
"Biz o yollara girməkdən çəkinirik. Pis yolda tək bizim
deyil hamının maşını xarab olur", – meriyanın
balansında olan Avtopark MMC-nin direktoru bildirdi.
"Biz növbə təyin etmişik və nəqliyyat ona əsasən həmin
yollara girir. Yollar pisdir, vəd verirlər ki, düzələcək, nə
bilim”, – “Ekspress turist" MMC-nin rəhbəri Yuri
Samxaradze dedi.
Marneuli merinin müavini Zaur Tabatadze bildirdi ki, Marneulidə
kanalizasiya sistemi layihəsini həyata keçirən şirkətə artıq
xəbərdarlıq edilib.
“Ötən həftə işlər aparan şirkətlə görüşümüz oldu. Onlara
xəbərdarlıq olunub. Bu yalnız Saimerlonun problmi deyil, başqa
yerdə də var. Qısa vaxt ərzində
düzəldəcəklər”
“Qısa vaxt”-ın nə zaman olacağı isə məlum deyil. Qeyd edək ki,
Saimerlo sakinləri bir neçə ay əvvəl də bu kimi problem qarşısında
qalıblar. Əhalinin tələbi əsasında xarab olmuş yolları doldursalar
da, qısa müddət ərzində yenidən xarab olub.