“Ambarovka, Algeti Üzümçülük Təsərrüfatı və Keşəli kəndləri yaxın vaxtlarda içməli su ilə təmin ediləcək”, – Zaur Darğallı (VİDEO)
15:23 / 23.07.2020
Marneuli bələdiyyəsinin Kürtlər, Algeti və Kəpənəkçi ərazi
vahidliyinə daxil olan kəndlərinə yeni içməli su xətti çəkilir.
Yeni xətt çəkildikdən sonra Algeti, Təzəkənd, Əzizkənd,
Hacıisakənd, Kürtlər, Ambarovka, Algeti Üzümçülük Təsərrüfatı və
Keşəli kəndləri içməli su ilə təmin olunacaq. Tender yanvar ayında
elan edilmişdi və mart ayında layihə başlamalı idi. Amma
pandemiyaya görə layihə may ayında başladı.
İndi layihəni birinci hissəsi sona çatıb və yaxın vaxtlarda
Ambarovka, Algeti Üzümçülük Təsərrüfatı və Keşəli kəndləri içməli
su ilə təmin ediləcək.
Marneuli meri Zaur Darğallı “Marneuli” radiosu ilə söhbəti zamanı
bildirdi ki, onlar artıq xəttin ikinci hissəsinin tikintisinə də
başlayıblar və maksimum iki ay ərzində əhalini keyfiyyətli içməli
su ilə təmin edəcəklər.
“Xəttin Kəpənəkçi hissəsini artıq sona çatdırmışıq.
Kəpənəkçi hissəsində yerləşən Ambarovka, Keşəli kəndinin bir
hissəsi və Algeti Üzümçülük Təsərrüfatı kəndlərində tikinti
işlərini sona çatdırmışıq və düşünürəm ki, artıq gələn həftədən
həmin kəndləri içməli su ilə təmin edəcəyik. Həmçinin xəttin ikinci
tərəfində də artıq işlər başlayıb. Bu Kürtlər ərazi vahidliyində
yerləşən kəndlərin, həmçinin Algeti vahidliyində yerləşən kəndlərin
içməli su ilə təmin olunmasıdır. Burda da işlər gedir. Düşünürəm
ki, bir ay yarıma, iki aya bu kəndləri də su ilə təmin edəcəyik.
Ancaq bildirdiyim kimi, Kəpənəkçi vahidliyində yerləşən üç kəndi
gələn həftədən etibarən təmiz su ilə təmin edəcəyik. O xətti sona
çatdırmışıq və paralel şəkildə ikinci xəttə də aktiv şəkildə işlər
gedir”, – Zaur Darğallı dedi.
Onu da əlavə edək ki, yerli özünüidarə kəndlərin su ilə təmin
edilməsi üçün 3 150 685 lari dəyərində tender elan edib. Tender
yanvar ayında elan edilmişdi və mart ayında layihə başlamalı idi.
Amma ölkədə koronavirusun yayılmasına görə layihənin həyata
keçirilməsi may ayına kimi təxirə salındı. Tenderə görə, qalib
gələn şirkət işləri müqavilə bağlandıqdan sonra 135 gün ərzində
başa çatırmalıdır.