Marneuli sakinləri şəhərdə çəkilən kanalizasiya və su xətlərinin onların hərəkətinə maneçilik törətməsindən şikayətlənirlər
20:50 / 31.07.2020
Marneuli şəhərində bir neçə aydır ki, kanalizasiya və su xətlərinin
çəkilişinə başlanılıb. Şəhərin Jordaniya, Səməd Vurğun, 26 may və
digər bir sıra küçələrdə işlər həyata keçirilir. Layihə işləri
2021-ci ilə qədər başa çatdırılmalıdır.
Buna görə də işlər sürətlə həyata keçirilir. Amma sakinləri bir
problem narahat edir. Onların sözlərinə görə, şəhərdə çəkilən
kanalizasiya və su xətləri onların hərəkətinə maneçilik törədir.
Belə ki, küçələrdə asfalt qatları sıradan çıxıb və avtomobillə
hərəkət etmələrində çətinlik yaradır. Sakinlər ümid edirlər ki,
layihə tez bir zamanda bitəcək.
Marneuli meri Zaur Darğallı “Marneuli” radiosu ilə söhbəti zamanı
bildirdi ki, su-kanalizasiya layihəsi başa çatanadək Marneulidə
infrastruktur, yol layihələri başlamayacaq. Onun sözlərinə görə,
Marneuli şəhəri, Qızılhacılı kəndi, Candar qəsəbəsi, Tsereteli və
Saimerlo kəndləri tam olaraq 24 saatlıq içməli su ilə təmin
olunacaq.
Qeyd edək ki, Marneuli və Bolnisi bələdiyyələrində yeni su xəttinin
çəkilməsi və kanalizasiya sisteminin yenidən qurulması işləri
həyata keçirilir. Layihəni “Şəhər Xidmətinin Yaxşılaşdırılması Üzrə
Sərmayə” proqramı çərçivəsində Asiya İnkişaf Bankı maliyyələşdirir
və layihənin dəyəri 55 940 022 dollardır.