Gürcüstan-Azərbaycan sərhədində, Qırmızı Körpü yaxınlığında dayanıb
müştərilərinin gəlməsini gözləyən taksiləri bu gün də görmək
mümkündür.
Sürücülər Qırmızı Körpüyə yaxın məsafədə yerləşən Kirəç Muğanlı,
Xancığazlı və Təkəli kəndlərindən gəlir və hər səhər Marneuli,
Tbilisi və ya Rustaviyə gedəcək müştəri tapmaq ümidi ilə
gözləyirlər.
“Marneuli” radiosu ilə söhbətləri zamanı onlar tək gəlir
mənbələrinin taksi fəaliyyəti olduğunu dedilər. Kirəç Muğanlı kənd
sakini Alı Qarayev 20 ildir ki, taksi xidməti göstərdiyini deyir.
O, sərhədin açıq olduğu vaxtlar sərnişinin çox olduğunu, gündəlik
50-80 lari arası qazancının olduğunu deyir. Lakin bu gün o, həftədə
bir dəfə müştəri aparır və cəmi 5-10 lari arası qazanc əldə
edir.
“Azərbaycandan gələn müştəriləri götürüb Gürcüstanın
hər yerinə aparırdıq. Çörək pulumuzu çıxarıb ailəmizi
dolandırırdıq. 10 aya yaxındır ki, yol bağlanıb və gələn yoxdur.
Həftədə bir dəfə bir nəfər olar, ya olmaz. Vəziyyətimiz çox
çətindir, dolana bilmirik, başqa işimiz yoxdur. Dövlətdən yardım
almadıq, sadəcə qaza, işığın ödənişinə kömək etdilər. Bəzən sənədlə
gələnlər olur, ya da tır sürücülərindən tır parka gedən olur. 5
manat, 3 manat verirlər, olsa, odur. Sərhəd bağlanmazdan əvvəl
yaxşı idi, hamı dolanırdı.”
Qarayevin sözlərinə görə, sərhədlər bağlı olduğu üçün o,
Gürcüstandan kənarda yaşayan nəvələrini də aylardır ki, görə
bilmir.
Koronavirusun yayılması səbəbi ilə dünyada və eləcə də Gürcüstanda
müəyyən qadağalar tətbiq olundu. Bu qadağalardan biri də
sərhədlərin bağlanılması idi. Gürcüstan-Azərbaycan sərhədləri 14
mart tarixindən etibarən hər iki ölkənin Baş nazirlərinin qərarı
ilə 10 gün müddətinə bağlanıldı. Lakin bu müddət uzadıldı və bu
gün, 10 dekabr tarixində də ölkənin sərhədləri bağlıdır.