Yeni Düşüncə İnstitutu “Qadına qarşı zorakılığa yox” adlı 16 günlük
beynəlxalq kampaniyaya qoşulub.
Kampaniya çərçivəsində NTİ-ın tələbələri 5 il ərzində Yeni Düşüncə
İnstitutu tərəfindən qadınlarla bağlı gördükləri işlər və həyata
keçirdikləri layihələrlə bağlı videomaterial hazırlayaraq,
məlumatlar veriblər.
NTİ-ın təsisçilərindən Kamran Əfəndiyev “Marneuli” radiosu ilə
söhbəti zamanı bildirdi ki, videonun hazırlanma ideyası NTİ-ın
təsisçilərindən Ariz Daşdəmirova məxsusdur. O, bu video sayəsində
cəmiyyətə qadınların güclü olduğunu çatdırmağa çalışdıqlarını
bildirdi.
“Formatımız belədir ki, Yeni Düşüncə İnstitutunda 5 il
ərzində qadınlarla bağlı fəaliyyətləri, layihələri cəmiyyətə
çatdıraq ki, onlara stimul olsun. Qadının bacarmayacağı heç bir şey
yoxdur və biz bunu çatdırmağa çalışdıq. Biz qadınlara imkan
verdiyimiz təqdirdə qadınlar hər şeyi etməyə qadirdirlər. Biz
problemin həll yolunu göstəririk və özümüz də həll etməyə
çalışırıq”, – Kamran Əfəndiyev dedi.
Məlumat üçün qeyd edək ki, Yeni Düşüncə İnstitutu 5 il ərzində
“Kiçik sahibkarlıq” (gözəllik salonu, lavaşxana, istixana, otlaq
ərazilərinin suvarılması və s.), “Universitetə hazırlıq”, “Analar
məktəbi” (gürcü, ingilis dili və kompüter dərsləri) və bu kimi bir
sıra layihələr hazırlayıb və kəndlərdə yaşayan qadınların işlə
təmin olunmasına imkanlar yaradıb.