Marneulidə un bahalanıb. Bir neçə kiçik sahibkar bildirdi ki,
təxminən bir aydır qiymət demək olar hər gün artır.
Satıcılar bildirirlər ki, unun qiyməti orta hesabla 10-12 lari
artıb. Əgər indiyə kimi 50 kq-lıq əla növ un 53 lari idisə, indi
onun qiyməti 65 laridir. Onların sözlərinə görə, qiymətlərin
bahalaşması alıcılara də təsir göstərib.
“Qiymət mərhələli şəkildə artdı. Gah bir lari, gah iki
lari artırdı. Subsidiya yalnız çörəkxanalar üçündür. (Böyük
müəssisələr) iki tondan artıq çörək bişirilən yerlər yenə 53
lariyə, vətəndaşlar isə 65 lariyə alırlar. 64 lariyə almışam, 65
lariyə də satıram. Gündə 20-25 kisə ancaq satılır. Əvvəl bir adam 5
kisə alırdı. Bu gün isə birini güclə alır”, –
kiçik sahibkar Nəsimi Bəxtiyarov dedi.
Rəsmi müsahibə verməkdən çəkinən daha bir kiçik sahibkar şəxsi
söhbət zamanı bildirdi ki, çörək ununun qiyməti iki həftəyə
təxminən 5 lari artıb.
Gürcüstanın Milli Statistika Xidmətinin məlumatına görə, ötən illə
müqayisədə Gürcüstanda çörək və un məhsulları 7,8 faiz
bahalaşıb.