Marneuli meriyası ərazisində diqqətdən kənar qalmış itlərin
sığınacağa yerləşdirilməsi (ehtiyac olan halda eftanaziya və
heyvanların basdırılması) xidməti üçün tender elan edib.
Tenderin dəyəri 21 186 laridir. Tenderdə iştirak etmək istəyənlər
21 dekabrdan 23 dekabra qədər təkliflərini təqdim edə bilər. Qalib
şirkət işləri bir il ərzində, mərhələli şəkildə, bələdiyyənin
tələbi əsasında yerinə yetirməli olacaq.
Son bir neçə ildir ki, Marneuli meriyası itlərin sığınacağı ilə
bağlı tender elan edir və tenderdə illərdir ki, “Vektra” MMC qalib
gəlir. Şirkət yerli özünüidarəyə 2020-ci ildə tenderdə 21 000 lari
təklif edib.
Hər il tenderlərə baxmayaraq bələdiyyədə bu gün də sahibsiz itlər
problemi ciddi şəkildə qalmaqdadır. İtlərin əksəriyyətində müəyyən
qədər təhlükəsizliyi göstərən sarı rəngli işarə də yoxdur.
“Marneuli” radiosu Marneulidə çoxalan sahibsiz itlər problemi ilə
bağlı dəfələrlə süjet hazırlayıb. 2019-cu ildə itlər üçün regional
sığınacağın tikilməsi planlaşdırılırdı və məkanlardan biri olaraq
məhz Marneuli nəzərdə tutulmuşdu. Meriyadan “Marneuli” radiosuna
bildirdilər ki, Regional sığınacaq layihəsi hələ həyata keçirilmə
mərhələsində deyil. Əgər layihə 2020-ci il ərzində həyata
keçirilərsə, bələdiyyə müvafiq tədbirlər görəcək.
2020-ci ilin 7 avqust tarixinə olan məlumatlara əsasən, Marneuli
bələdiyyəsinin tibbi müəssisələrində 7 ay ərzində 648 quduzluq
əleyhinə vaksin vurulub. Onlardan əksəriyyəti it dişləməsi faktı
ilə bağlıdır.