Marneulinin keçmiş majoritar deputatı Ruslan Hacıyev “Mtavari”
kanalının direktoru Nika Qvaramianın müsəlmanlardan üzr istəməsini
tələb edir.
“Marneuli” radiosu ilə söhbəti zamanı keçmiş deputat Qvaramianın
"İvanişvili Saakaşvilini Allah, məni isə Məhəmməd olaraq görür"
deyə səsləndirdiyi fikirlərin qəbuledilməz olduğunu bildirdi.
O, hər bir insanın bir-birinin müqəddəs dəyərlərinə hörmətlə
yanaşmasının vacib olduğunu və bu kimi fikirlərin İslam dininə
qarşı hörmətsizlik olduğunu dedi.
“Bu fikri, səhv və qəbuledilməz bir fikir olaraq qəbul
edirəm. Heç bir insanın dini, müqəddəs dəyərləri ilə oynamaq, özü
və ya hər hansı bir siyasi xadimi bəhs gətirmək qəbuledilməzdir.
Bütün dinlər üçün mən bunu deyirəm. Qvaramianın son fikirlərində
Allahla kimisə müqayisə etməsi, Məhəmməd Peyğəmbərimizin adından
istifadə etməsi çox xoşagəlməz bir fikirdir. Dərhal bu söylədiyi
fikirlərinə görə üzr istəməsini tələb edirəm. Heç bir ümmətin
müqəddəs dəyərləri ilə oynamağa, onu dilə alıb danışmağa, hələ ki,
belə mənfi bir mövzuda dilə alıb danışmağa haqqı, hüququ
yoxdur.”
Qeyd edək ki, Nika Qvaramia Bidzina İvanişvilinin siyasətdən
ayrılması ilə bağlı yazdığı məktuba “Mtavari” kanalının efirində
danışarkən fikir bildirib.
O, İvanişvilinin Gürcüstanın sabiq prezidenti Mixail Saakaşvilini
Allah, Qvaramianı isə onun Peyğəmbəri, Məhəmməd olaraq düşündüyünü
deyib.