Distant təhsil və təhsildən kənar qalmış xüsusi ehtiyacı olan şagirdlər
00:00 / 14.01.2021
Demək olar bir ildir ki, ölkədə yayılmış koronavirus əhalinin yaşam
tərzini çox istiqamətdə dəyişdi və faktiki olaraq hər şey onlayn
rejimlə əvəz edildi.
Marneulidəki təhsil müəssisələri bu günə qədər də onlayn rejimdə
işləyir.
Bələdiyyə miqyasında 74 ictimai məktəb var. Bunlardan 66-sı
kəndlərdə yerləşir. Kəndlərdə isə əksər hallarda internet və
texnologiyaların əlçatanlığı mürəkkəb məsələdir. Yeni “məktəb”
mühitində isə kompüter və internet əsas rol oynayır. Demək olar ki,
bu vəziyyət xüsusi ehtiyacı olan şəxslər üçün ikiqat çətin oldu.
Onlar üçün birbaşa ünsiyyət və gündəlik inkişaf mütləqdir.
Marneuli Təhsil Resurs Mərkəzinin neçə şagirdin dərs prosesinə
qoşula bilməməsi barədə statistikası yoxdur. Ancaq xüsusi təhsilə
ehtiyac duyan 150-yə yaxın şagird qeydə alınıb.
17 yaşlı Xəyalə Əhmədova Marneuli kənd məktəblərindən birində
beşinci sinifdə oxuyur. Onun nə kompüteri, nə də interneti var.
Buna görə də dərslərdə iştirak edə bilmir. İndi bələdiyyədən
kənarda aldığı xidmətlərdən də yararlana bilmir. Anası Xədicə
Əhmədova övladı ilə danışmaq üçün “özünəməxsus jest dilini” öyrənib
və onunla ünsiyyət qura bilir. Ancaq dərslərinə kömək edə
bilmir.
„“Bu diaqnoz anadangəlmədir. Aparat da aldırdılar,
ancaq nəticəsi olmadı. Məktəb yaxşı idi, müəllimə inanırdı, nə
deyirdilər, yerinə yetirirdi. Oxumaq bilmir, yazını az da olsa
bacarır. Gürcü, ingilis və azərbaycan dilində yaza bilir. Əgər
müəllim yazarsa, bu da təkrar edə bilir. Mənim qızım da bunun
öhdəsindən gəlirdi. İstəyir ki, müəllim və rəngarənglik olsun.
Mənimlə sakit oturmur, yazmağa ərinir. Jest dilini özüm öyrənmişəm.
Kiçik olanda başa düşdüm ki, həmişə bir yerdə olacağıq və ünsiyyət
üçün nə isə düşünməli idim. Məktəbdən kənar daha da əsəbi olub. Heç
kimlə münasibəti yoxdur, orada şagirdlərlə oynayırdı və daha sakit
idi.”
Hüseynovlar ailəsi də yeni təhsil modelinə keçə bilməyib. Elxan
Hüseynov deyir ki, pandemiya onlara mənfi təsir göstərib və məktəbə
getməyi başqa heç nə ilə əvəz edə bilməyiblər. Onun 19 yaşlı qızı,
xüsusi ehtiyacı olan şəxsdir. Beşinci sinifdə oxuyur və demək olar
10 aydır təhsil prosesindən uzaq qalıb.
“Onlayn dərslər
başlayandan uşaq hələ təhsil prosesinə qoşulmayıb. Kompüter,
telefon yoxdur ki, uşaq girib dərslərdə iştirak etsin. Ailədə
əsasən anası kömək edir. Çalışır ki, danışdırsın, ev işləri
öyrədir. Uşaq danışa bilmir, bizə heç nə başa sala bilmir və çox
əziyyət çəkirik. Eşitmə problemi var. Əlifbada bütün hərfləri
tanıyır, ancaq oxuya, başa sala bilmir”.
Distant təshil çətinliklərindən söhbət açanlardan biri isə
pedaqoqdur. Onunla gizliliyi qorumaq şərti ilə müsahibə yazdıq.
Müəllim deyir ki, şagirdlərin əksəriyyəti məhz internet və
kompüterin olmamasına görə dərsdə iştirak etmir.
“İbtidai siniflər daha çox qoşulur. Onlara “book”-lar yeni verilib
və onunla qoşula bilirlər. Ancaq yuxarı sinifdə bəzilərinin
“book”-u xarab olub və ona görə qoşula bilmirlər. Bəzisi interneti,
telefonu, yaxud kompüteri olmadığına görə
qoşulmur.”
Marneuli Təhsil Resurs Mərkəzindən bildirdilər ki, inkluziv
təhsildə yaranmış problemlərlə bağlı məktəblər onlara müraciət
etməyib və xüsusi müəllimlər maksimum dərəcədə şagirdlərin dərslərə
qoşulma prosesi üzərində çalışırlar.
“Fiziki imkanları məhdud, yaxud xüsusi ehtiyacı olan, bütün birinci
sinif şagirdlərinin hamısına nazirlik tərəfindən “book”-lar
veriləcək. Nazirliyin çoxsahəli komandası onlar üçün (xüsusi
təhsilə ehtiyac duyan şagirdlər) ayrı, daha da təkmilləşdirilmiş
proqram hazırlayıblar. Pedaqoqlar dərsi məhz buna əsasən idarə
edəcəklər. Əgər kompüterləri yoxdursa, məktəb verə
bilər”, – Resurs Mərkəzdən bildirdilər. Ancaq bizim
bir neçə məktəbə zəng vurmağımız nəticəsində məlum oldu ki, təhsil
müəssisələrinin belə bir resursu yoxdur.
Bir neçə il əvvəl beynəlxalq təşkilat Marneulidə xüsusi ehtiyacı
olan şagirdlər üçün müvafiq xidmətlərin yaradılmasının qayğısına
qalmağa başladı. Həmin təşkilat sonradan yerli bələdiyyənin
balansına keçdi. Qızılhacılıda yerləşən erkən müdaxilə mərkəzi 18
yaşa qədər olan 30 benefisiara xidmət göstərir. Təhsil
müəssisəsinin xüsusi müəllimi Zərnişan Mursaqulova deyir ki, indi,
pandemiya dövründə tədris prosesi çox çətinləşib. Evdə təhsilin
mütləq olmasını nəzərdə tutan xidmətlərdən biri faktiki olaraq ləğv
olunub.
Marneulidə fəaliyyət göstərən və xüsusi ehtiyacı olan şəxslər üçün
yaradılmış daha bir təhsil müəssisəsi onlayn, distant rejimdə
açılıb. Mərkəzin rəhbəri Maia Bibileişvili deyir ki, üzbəüz xidmət
göstərməyin alternativi yoxdur. Hələ ki, ehtiyacı olan uşaqlardan
söhbət gedirsə, hər bir dərs həlledici rol oynayır.
“Psixoloqlar bu barədə danışır ki, uşaqlarda kompüterə
bağlılıq yaranmamalıdır və kompüter qarşısında gündə ən çox bir
saat vaxt keçirməlidirlər. Aydındır, əgər internet, telefon, yaxud
kompüterləri varsa, bu gün isə hər şeyi artıq dozada etməli
olurlar. 17-19 yaşlı uşaq beşinci sinifdədirsə, bu prinsipial
şəkildə qəbuledilməzdir. Xüsusi təhsilə ehtiyacı olan şagirdlərin
də öz yaşıdları ilə sinifdə oturmaq və inkişaf etmək hüququ
var.”
Təhsil Nazirliyi bu kimi ehtiyacı olan uşaqlara nə təklif edir və
inkluziv təhsilin inkişafı baxımından hansı planları var, bu
suallara cavab ala bilmədik. Çoxsaylı cəhdlərimizə baxmayaraq
onlarla müsahibə yazmaq mümkün olmadı. Yayılmış məlumata görə,
Təhsil Nazirliyinin prioriteti bütün şagirdlərin davamlı,
keyfiyyətli təhsilə əlçatanlığını təmin etmək və inkluziv təhsilin
inkişafıdır. Bu istiqamətdə isə bir neçə layihə hazırlayıblar.
Layihə şagirdlərə yazılı, kommunikasiya, yaradıcılıq və davranış
bacarıqlarının inkişafında kömək edəcək. Qurumun məlumatına görə,
xüsusi təhsilə ehtiyac duyan şagirdlər üçün ictimai məktəblərdə
işlə təmin edilmiş 200-ə yaxın assistent hazırlanıb.
Bu xidmətlərə baxmayaraq “İnsan Hüquqları üçün Tərəfdaşlıq”-ın
rəhbəri Ana Abaşidze hesab edir ki, dövlət bu vəziyyətdə olan
uşaqlara nə dərəcədə ziyan vurduğunu hələ başa düşməyib. Bir ildir
karantində yaşayan şəxslər düşünür ki, uşaqların məktəbdən
uzaqlaşdırılması dövlət üçün ən asan çıxış yolu və “kasıb” qərar
idi. Bu uşaqların emosional vəziyyətinin ciddi
gərginləşdirilməsidir. Onlar üçün onlayn xidmətlər qəbul etmək isə
qeyri-bərabərlikdir.
Ana Abaşidze deyir ki, dövlət onlayn vasitələrlə təhsil ala
bilməyən şagirdlər barədə düşünməyib və başqa alternativ də təklif
etməyib. Bir fakt var, şagirdlərin nə qədər müddət bu şəraitdə
“təhsil alacağı” heç kimə məlum deyil.