Marneulidə işləyən müəllimlərin və rəhbərlik nümayəndələrinin
hərəkətini məktəblər təmin etməlidir.
Bu barədə Təhsil Nazirliyindən “Marneuli” radiosuna bildirdilər.
Qurumdan verilən məlumata görə, Gürcüstanın Təhsil, Elm, Mədəniyyət
və İdman Nazirliyi mövcud məhdudiyyətlər şəraitində məktəblər üçün
alternativ tövsiyələr hazırlayıb. Əgər müəllim, yaxud məktəb
rəhbərliyi nümayəndəsi məktəbdən uzaq yaşayırsa, müxtəlif
imkanların müzakirə olunması məqsədəuyğundur.
“Məktəb tərəfindən nəqliyyat vasitəsi icarəyə
götürülsün və həmin nəqliyyat vasitəsilə müəllimlərin və məktəb
rəhbərliyi nümayəndələrinin məktəbə və geri aparılması təmin
olunsun. Əgər məktəbin bu xidmət üçün maddi resursu yoxdursa,
xərclər qanunvericiliyə uyğun qaydada nazirlik tərəfindən
qarşılanacaq. Məktəb Təhsil Resurs Mərkəzi və yerli hakimiyyət
nümayəndələri ilə birgə müxtəlif proqramlar çərçivəsində
müəllimlərin və məktəb rəhbərliyi nümayədələrini nəqliyyatla təmin
edəcək”, – nazirlikdən bildirirlər.
Marneuli Təshil Resurs Mərkəzinin rəhbəri Kənan Ömərovun sözlərinə
görə, indiki mərhələdə neçə nəfər müəllimin və rəhbərlik
nümayəndəsinin nəqliyyata ehtiyacı olması barədə məlumat yoxdur.
Onun sözlərinə görə, artıq araşdırma aparılır.
“Məktəblər bu mövzu üzərində işləyir. Elə müəllimlər
var, öz evlərindədirlər, eləsi var hüquqi baxımdan başqa yerdədir
və orada yaşayır. Bununla bağlı məktəblər tərəfindən araşdırma
aparılır.”
1 fevral tarixindən Marneuli bələdiyyəsində tədris prosesi sinif
otaqlarında davam etdiriləcək. Müəllimlərin bir qismi Marnueliyə
Tbilisidən, Rustavidən və digər bələdiyyələrdən gəlir. İctimai
nəqliyyatın hərəkəti isə dayandırılıb.