Bu gün, 25 fevral tarixində Gürcüstan miqyasında şəhərlərarası
ictimai nəqliyyatın hərəkəti bərpa edilib. Marneuli-Tbilisi xətti
üzrə hərəkət edən mikroavtobuslar da hərəkətini bərpa edib.
Marneuli-Vağzal meydanı xətti üzrə hərəkət edən mikroavtobusun
sürücüsü Biçiko Xarşiladze “Marneuli” radiosu ilə söhbəti zamanı
bildirdi ki, səhərdən saat birə qədər Tbilisi istiqamətində yalnız
iki avtobus yola çıxıb.
“Sərnişinlər tək-tük idi, cəmi iki maşın yola çıxıb və
4-5 nəfər aparıblar. Əhali hələ bilmir. Bu gün qardır, yol da
donmuşdu. Heç biz də sürücülərdən getmələrini tələb etmirik. Ancaq
sabahdan adi rejimdə işləməyə davam edəcəyik”, –
Biçiko Xarşiladze bildirdi.
Marşrut sürücüsünün sözlərinə görə, Marneuli-Vağzal Meydanı xətti
üzrə hərəkət edən mikroavtobuslarda gediş haqqı yenə 2 lari 50
tetri olacaq.
“Maşın dayananda və sərnişinləri gözləyəndə də hamıya
bildiririk ki, maskasız maşına minmək olmaz. Əgər maskası yoxdursa,
minməyə qoymuruq, gedib alırlar, sonra icazə
veririk”, – Biçiko Xarşiladze dedi.
Xarşiladze deyir ki, şəhərlərarası ictimai nəqliyyatın hərəkətinin
məhdudlaşdırılmasına görə üç aydır işsiz qalıb və düşünür ki,
məhdudiyyətin götürülməsi yaxşı qərardır. Biçiko ilə yanaşı eyni
şirkətdə işləyən daha 23 sürücü 3 ay ərzində işsiz qalıb.