Marneuli sakini Gülcahan Acalova koronavirus pandemiyasına
baxmayaraq yeni fəaliyyətə başlayıb və “Culia” tikiş atelyesi təsis
edib.
Gülcahan USAİD artım layihəsi çərçivəsində RDFG-nın regional gənc
sahibkarlar proqramının qalibi olub və biznes ideyasını həyata
keçirmək üçün 7 000 lari həcmində qrant qazanıb. Qeyd olunan pulla
tikiş maşınları və fotoaparat alıb. O, noyabr ayından fəaliyyətə
başlayıb.
“Tez zamanda atelyeni rəsmi şəkildə açmağı düşünürdüm.
Ancaq hökumət məhdudiyyətlər tətbiq etdi və bazarlar bağlandı.
Mənim ləvazimatlar aldığım adamlar “Lilo” bazarında işləyir və
lazım olan materialları ala bilmədim. Yalnız saplar və əlçatan
ləvazimatlar ala bildim. Bir neçə don tikib
hazırladıq.”
İndiki mərhələdə Gülcahanın atelyesində özü ilə yanaşı bir qadın da
işləyir. Gülcahanın sözlərinə görə, gələcəkdə ideyasının yalnız
atelye olaraq qalmasını düşünmür. O, öz brendini formalaşdırmağı
planlaşdırır.
“Hər şeyi bir-iki həftəyə planlaşdırdım. İndi təhsilə də
başlamışam. Özəl müəllim yanında gedirəm və tikiş kursları keçirəm.
Doğrudur mənim üçün yeni sahədir, ancaq istəyirəm ki, sona qədər
öyrənim. Düşünürəm ki, biznes və sahibkralığa marağı olan hər kəs
üçün öz biznesini açmaq əhəmiyyətlidir. İstəmirəm ki, biznesim
kiçik atelye olaraq qalsın, istəyirəm brend
formalaşdırım.”
Gülcahan universitetdə biznes administrasiyası fakültəsini bitirib
və ondan sonra həmişə öz biznesini qurmaq istəyib. Atelye açmaq
ideyası isə xalasının ixtisasından irəli gələrək yaranıb.
“Xalam dərzidir və həmişə paltarları necə tikdiyinə
baxırdım. Bu proses çox xoşuma gəlirdi. Mən də istəyirdim ki, belə
bir işlə məşğul olum. Ancaq mənim ideyalarım bir az geniş
miqyaslıdır. İstəyirəm bu brend olsun. Mənim üçün güclü brend
formalaşdırmaq mühümdür. Bir halda ki, mən marketinq
mütəxəssisiyəm, bunu edə bilərəm və özümə güvənirəm”,
– Gülcahan bildirdi.
Gülcahan gələcəkdə atelyesində daha bir neçə qadını işlə təmin
etməyi planlaşdırır. O, qeyd edir ki, atelyeni açmaqda əsas
məqsədlərindən biri də evdar xanımların hazırlanması və işlə təmin
olunmasıdır.