Marneuli bələdiyyəsinin bütün məktəblərində tədris prosesi sinif
otaqlarında bərpa olunacaq.
Yerli resurs mərkəzin nümayəndəsi İrma Davadze “Marneuli” radiosu
ilə söhbəti zamanı bildirdi ki, 13 may tarixindən bələdiyyədə
mövcud olan təhsil müəssisələri, ictimai və özəl məktəblər tədrisi
sinif otaqlarında davam etdirəcəklər.
“İndiki mərhələdə nə müəllimlərdə, nə də şagirdlərdə
koronavirusa heç bir yoluxma qeydə alınmayıb. Bu gün və dünən bütün
sinif otaqları, dəhlizlər təmizləndi, xüsusi məhlulla dezinfeksiya
işləri aparıldı. Bildiyiniz kimi həmin məhlulları bizə nazirlik
verib. Müəllimlərin testdən keçirilməsi də davam
edəcək.”
İrma Davadzenin sözlərinə görə, Marneulidə işləyən pedaqoqlar da
peyvənd prosesinə qoşulmaq istəklərini bildiriblər. İndiki
mərhələdə pedaqoqların təxminən 3%-i peyvənd olunub.
“Bilirsiniz ki, peyvənd prosesi könüllüdür və istəyi
olan pedaqoqlar da var. Onlar qeydiyyatdan keçiblər, peyvənd
vurdururlar. “Astrazeneka” 55 yaşdan yuxarı olanlara vurulurdu.
“Sinofarm” üçün qeydiyyat başlayanda istirahət günlərinə təsadüf
etdi, ancaq dəqiq bilmirik neçə nəfər qeydiyyatdan keçib. Təxminən
3% peyvəndin birinci mərhələsində iştirak edib.”
Qeyd edək lazımdır ki, Gürcüstan miqyasında 4-11 may tarixinə qədər
istirahət günləri elan olunub. Bu dövr ərzində təhsil müəssisələri
də istirahət edir. Ölkədə ağır epidemioloji vəziyyət olduğuna görə,
istirahət günləri elan etməyə ehtiyac yaranıb.