Marneulidə Quşçu qalasında quraşdırılmış xaça ziyan vurublar. Bu
barədə Marneuli və Hucabi Yeparxiyası “Facebook” səhifəsində
məlumat yayımlayıb.
Yeparxiya xaça ziyan vurulmasını xristianlığa qarşı və vandalizm
kimi dəyərləndirib.
“Görünür, belə təxribatlarla regionda dini zəmində nifaq yaratmaq
istəyirlər. Bu bütün hədləri aşır və bizim dinimiz, dövlətimiz
qarşısında törədilmiş ən böyük cinayətdir”, –
Marneuli və Hucabi Yeparxiyasının bəyanatında deyilir.
Quşçu qalasında quraşdırılmış xaça artıq ikinci dəfədir ziyan
vururlar. 2021-ci ilin əvvəlində qaladan xaçı oğurlamışdılar. DİN
bununla bağlı oğurluq maddəsi ilə istintaq aparırdı.
Din xadimləri ziyan vurulmuş xaçı 13 may tarixində çıxarıb.
Marneuli və Hucabinin Yepiskopu Qiorqi (Camdeliani) həmin xaçı
Quşçu qalasında 27 yanvar tarixində, bayram əhval-ruhiyyəsi ilə
ucaltmışdı.
Daxili İşlər Nazirliyindən “Marneuli” radiosuna bildirdilər ki,
faktla bağlı Cinayət Məcəlləsinin 187-ci maddəsi ilə istintaq
aparılır. Həmin maddə əşyaya ziyan vurma, yaxud onu məhv etməni
nəzərdə tutur.